Galicia promocionarase nas cociñas da ONU

Dez restauradores galegos cociñarán para 400 persoas diarias no comedor de delegados de Nacións Unidas

Galicia entrará ata a cociña na sede de Nacións Unidas en Nova Iorque. Entre o 6 e o 17 de novembro, o persoal da ONU poderá degustar diariamente productos galegos cociñados por dez restauradores da Comunidade. Trátase dunha iniciativa pioneira das Consellerías de Innovación, Medio Rural e Pesca para promocionar os productos agroalimentarios e pesqueiros no exterior. Máis de 5.600 persoas disfrutarán desta mostra gastronómica que suporá, en palabras do conselleiro de Medio Rural, Alfredo Suárez Canal, ?un salto adiante? na promoción e comercialización dos productos do mar e do campo que redundará tamén na mellora do nivel de renta dos productores e por tanto na fixación de poboación no rural. A promoción, que permitirá abrir novos mercados, contribuirá, según Suárez Canal, a vender a marca galega como un ?seguro de calidade?. A conselleira de Pesca, Carmen Gallego, felicitou a Turgalicia por unha iniciativa que abrirá novos mercados no exterior. Os productos do mar serán unha das bases dos platos que o equipo de cociñeiros galegos presentará tanto no comedor de delegados da ONU coma nunha cea no mítico Rockefeller Center na que se reunirá a touroperadores, prensa especializada, importadores e distribuidores. A promoción completarase ademáis cunha comida exclusiva para 22 persoas na ONU á que asistirán representantes dos medios de comunicación máis importantes da cidade, membros do Goberno Galego e de Nacións Unidas. A promoción, baixo o título de ?Galicia segue sendo única?, supón un escaparate para presentar á Comunidade como destino turístico. Unha revista editada especialmente en inglés recollerá a esencia galega con información sobre gastronomía, os cociñeiros participantes, os productos e os viños propios da terra. Tamén haberá postais, folletos e vídeos promocionais de Galicia, ademáis de murais que se exporán na sede da ONU. O conselleiro de Innovación e Industria, Fernando Blanco, destacou que esta promoción é a primeira desta envergadura en Estados Unidos e espera que a iniciativa sirva de arrastre para o sector turístico, da pesca e do campo neste país. Blanco tamén salientou a colaboración das tres consellerías para levar adiante esta presentación e a puxo de exemplo como maneira de traballar a prol da economía e da creación de emprego.