O Marco organiza obradoiros infantís para o Nadal

O Museo de Arte Contemporánea de Vigo (Marco) organiza para este Nadal obradoiros dirixidos a un público de entre 3 e 8 anos de idade. O servizo educativo do museo adáptase entre o 26 e o 30 de decembro e entre o 2 e o 7 de xaneiro á diferencia de horarios desta época do ano para ofrecer alternativas de lecer a un público infantil e familiar. Baixo o título 'Regalos Mutantes/Regalos Sonoros', os obradoiros gardarán relación coas exposicións 'Pintura mutante' e 'A mostra invisible', que conclúen no mes de xaneiro. O persoal educador toma como punto de partida as mutacións dos medios, temas e materiais pictóricos, así como a percepción sonora, para realizar obxectos "multiusos" que poidan servir de agasallos de Nadal. Papeis de regalo, envoltorios, postais, adornos e pequenos instrumentos musicais serán o resultado dos obradoiros que durante as festas completarán as visitas ás salas de exposicións do Museo.