Galicia súmase á celebración do 60 aniversario do tratado de Roma

A Unión Europea celebra hoxe o sesenta aniversario do Tratado de Roma, que deu lugar á creación da Comunidade Económica Europea (CEE) e da Comunidade Europea da Enerxía Atómica (EURATOM). A primeira delas supuxo un antes e un despois no camiño á integración europea, xa que introduciu a cooperación económica entre os países membros da Comunidade.   

Os Tratados de Roma estableceron un mercado común no que persoas, bens, servizos e capital poden circular libremente, e crearon as condicións para a prosperidade e a estabilidade dos cidadáns europeos.   
A conmemoración desta efeméride prodúcese nun momento complexo para a UE, que segue traballando de cara o futuro da Unión, ao igual que Galicia, que mantén o seu férreo compromiso europeísta sobre a base da solidariedade, apoiada na idea dunha UE que manteña no futuro as políticas que contribuíron a reducir as diferenzas rexionais, como a de cohesión.   

Este 60º aniversario do Tratado de Roma, asinado o 25 de marzo de 1957, constitúe unha gran ocasión para que os dirixentes da UE dos 27 reflexionen sobre a situación do proxecto europeo. Por iso, os xefes de Estado e de Goberno da UE mantiveron hoxe unha reunión informal na capital italiana.   

Os dirixentes adoptaron a chamada “Declaración de Roma”, que establece unha visión conxunta para os próximos anos. Os 27 Estados membros, xa sen a presenza de Reino Unido, reivindicaron que durante as últimas décadas tense construído unha Unión que fomenta a cooperación pacífica, o respecto da dignidade humana, a liberdade, a democracia, a igualdade e a solidariedade entre as nacións e pobos europeos.   

A este respecto, Galicia coincide en que é un momento para celebrar a a historia europea, e para afrontar o difícil momento histórico actual, que esixe dunha reflexión profunda sobre os retos que afronta a Unión a curto e medio prazo.