GALICIA | SAÚDE

A espera para operarse é no Sergas 21 días inferior á media do SNS

O tempo medio de espera para unha intervención cirúrxica no Servizo Galego de Saúde era, en xuño de 2016, de 62 días, é dicir, 21 días menos que a media do Sistema Nacional de Saúde (SNS), de 83 días. Así se recolle nun informe comparativo publicado polo Ministerio de Sanidade, Servizos Sociais e Igualdade que inclúe unha comparativa dos datos de 16 Comunidades Autónomas -coa excepción de Cataluña-, Ceuta e Melilla.

Por especialidades, as diferenzas máis notables están nos eidos da neurocirurxía (60 días no Sergas fronte a 150 días no SNS), cirurxía plástica (75 días no Sergas fronte a 141 no SNS) e cirurxía pediátrica (54 días no Sergas fronte a 107 no SNS). Así mesmo, a porcentaxe de pacientes que teñen que agardar máis de 6 meses para unha intervención é do 4,5% no Sergas, fronte ao 8,8% do SNS.

Se se comparan os datos cos dun ano antes (xuño de 2015), o tempo medio de espera diminuíu en 15 días no Sergas e incrementouse en dous días na media nacional. Tamén se reduciu a porcentaxe de pacientes que esperan máis de seis meses (nun 3,1%), mentres que no SNS esta taxa aumentou nun 1,1%.

Dende decembro de 2012, o tempo de espera medio do Sergas foi sempre inferior á media estatal. En xuño de 2016 só catro comunidades (Andalucía, Madrid, País Vasco e A Rioxa) e as dúas cidades autónomas tiñan tempos medios de espera inferiores a Galicia.


Primeiras consultas

No que atinxe ás listas de espera para primeiras consultas, o tempo de espera no Sergas é de 35 días, fronte aos 51 días do SNS (16 días menos). Ao igual que sucede no eido das cirurxías, o tempo de espera medio para consultas foi, dende xuño de 2012, sempre inferior en Galicia á media estatal.

Así mesmo, a porcentaxe de pacientes que teñen que agardar máis de 6 meses para unha primeira consulta é do 17,7% en Galicia, fronte ao 41,1% do SNS. Esta taxa aumentou no Sistema Nacional de Saúde nun 11,5% entre 2015 e 2016, mentres diminuía nun 5% no Sergas no mesmo prazo.

Neste ámbito só catro CCAA (Castela-A Mancha, Madrid, País Vasco e A Rioxa) e as dúas cidades autónomas teñen tempos medios de espera inferiores a Galicia.

Estes datos reflicten o bo funcionamento das estratexias de xestión da espera do Servizo Galego de Saúde, baseadas nas indicacións establecidas polo profesional sanitario, a priorización dos pacientes en función da súa gravidade e a efectividade da atención sanitaria, así como no resultado previsible de cada intervención planificada.