GALICIA | CASO PAZO DE MEIRÁS
Luís Bará: "Os Franco teñen que pagar por todo o que roubaron"
SANTIAGO DE COMPOSTELA | En opinión do
deputado do BNG, Luís Bará a
sentenza da Audiencia Provincial da Coruña que recoñece o dereito dos herdeiros
do ditador a seren indemnizados polos
gastos do Pazo de Meirás dende o ano 75, despide un “insoportable tufo
franquista” e advirte que “Galiza non pagará dúas veces o Pazo de Meirás, teñen
que pagar aos Franco por todo o que roubaron”.
O nacionalista considera que a sentenza fai unha
valoración dos feitos “favorable e a
beneficio dos Franco” ao constatar unha doazón a Francisco Franco e non ao Xefe
do Estado, cando “isto é falso”. Tampouco acredita a “mala fe posesoria de Franco” e afirma a “boa
fe” dos seus herdeiros o que implica a liquidación dos gastos dende o ano 75 e
non dende 2018 cando foron declarados herdeiros. Polo tanto, esta circunstancia
tamén é unha “interpretación favorable aos intereses da familia Franco”.
Dende o BNG, afirma o deputado, entendemos que a sentenza
é unha peza máis dun proceso que busca “lexitimar e branquear o franquismo” e
beneficiar a familia do ditador despois
do espolio e rapina continuada durante décadas de franquismo
e despois do ano 1975 coa venda
de propiedades e bens adquiridos de maneira irregular.
O BNG exixe responsabilidades a todos os poderes do
Estado que dende o ano 1975 favoreceron e protexeron os intereses dos Franco,
comezando co Rei Juan Carlos I.
Lamentable
papel da Xunta
Bará tildou de lamentable o papel da Xunta de Galiza e as
declaracións do conselleiro de Cultura,
Román Rodríguez nas que priorizaba a devolución do Pazo de Meirás e asumindo
que hai que indemnizar a familia. Neste sentido, o deputado do BNG reitera que
“Galiza non vai pagar dúas veces, quen deben pagar son os Franco por todo o que
roubaron”. Por outra banda, considerou que a argumentación da Xunta e do titular
de Cultura poden incidir negativamente noutros bens espoliados como a Casa
Cornide ou esculturas do Mestre Mateo.
Bará anunciou que o BNG rexistrará unha iniciativa para
demandar da Xunta a presentación de recurso contra a sentenza da Audiencia
Provincial e unha investigación exhaustiva sobre todos os bens espoliados e as
persoas que se beneficiaron nesta “trama corrupta” así como estuar todas as vía para a devolución aos
seus lexítimos propietarios. Temos que rematar, dunha vez por todas coa
“impunidade e latrocinio continuado do franquismo e os seus herdeiros”. É o momento de respectar a memoria e legado das vítimas
e a súa reparación, concluíu. Departamento de comunicación