GALICIA | POLÍTICA
O PSdeG pide "esgotar" todas as posibilidades xurídicas para non pagar "nin un só euro á familia Franco"
SANTIAGO DE COMPOSTELA | O vicevoceiro do Grupo Socialista, Pablo Arangüena, vén de pedir que
se “esgoten todas as posibilidades xurídicas” para non pagar nin un só
euro á familia Franco”.
“A todos rechíanos pagarlle
incluso un céntimo de euro a esta familia e, nese sentido, aínda que o
recurso sexa moi difícil ou aínda que non sexa admitido polo Tribunal
Supremo, cremos que se hai a máis mínima posibilidade de intentalo,
haberá que facelo”, sentenciou.
Así, o responsable
socialista subliñou que a decisión de recorrer “que sería técnica en
condicións normais, aquí é case unha cuestión moral” e, polo tanto, “hai
que ir máis alá das cuestións técnicas” e esgotar todas as
posibilidades xurídicas. “Hai dous anos, cando aínda non
se presentara a demanda xudicial pola Avogacía do Estado, absolutamente
ninguén apostaría os seus cartos a que se recuperaría a propiedade do
Pazo de Meirás sen ter que indemnizar o valor do inmoble á Familia
Franco”, aseverou o socialista.
Arangüena subliñou que “este éxito débese ao compromiso e á firme
vontade política dun goberno progresista”, xa que quen presentou a
demanda para a recuperación do ben foi a Avogacía do Estado e, con
posterioridade, as outras administracións adheríronse á citada demanda.
“Se
fose pola Xunta de Feijóo, o pazo seguiría en mans dos Franco porque en
11 anos de goberno, o único que fixo espontaneamente o goberno galego
con respecto a Meirás foi chegar a un acordo coa Fundación Franco para
que o abrise 4 días o mes, logo de que o goberno bipartito de Emilio
Pérez Touriño o declarase BIC”, sinalou o socialista, quen criticou que,
grazas a este acordo, “o que fixo a Fundación Francio foi exaltar a
figura do ditador”.
Doutra banda, o responsable
socialista pediu que se prioricen os usos do pazo relacionados coa
reivindicación da memoria democrática, xa que a Xunta de Galicia, “coa
escusa do legado de Emilia Pardo Bazán”, trata de “minimizar” o que
debe ser o cometido principal do pazo: “explicar, difundir e reivindicar
a memoria histórica e democrática, que é o que faría calquera
democracia avanzada”.
Comisión de reactivación
En canto á Comisión de Reactivación, Arangüena amosou a súa
“preocupación” cando “ante unha ocasión histórica e irrepetible para
modernizar a nosa economía e a nosa sociedade” a través dos ondos
europeos Next Generation, “non percibimos que a Xunta estea facendo os
deberes” logo dun ano de pandemia.
“Non temos máis
información dos famosos 108 proxectos que o que lemos nos periódicos,
que son especulacións, sen contido nin plan nin forma definida”,
sinalou. Así, lamentou que “o único documento concreto que se presentou
sobre os proxectos na comisión foi un texto que, se lle quitamos o
índice e a portada, son 10 folios en letra grande que podería redactar
un estudante espabilado de primeiro de Económicas”, o que supón unha
“auténtica tomadura de pelo”.
Finalmente, o responsable
socialista sinalou que “Galicia se xoga moito cos fondos europeos”, polo
que instou ao goberno galego a “facer precisamente a política
industrial que non fixo nos últimos 11 anos: atraer capital de fóra,
mobilizar aos empresarios do país, buscar sinerxías e establecer
alianzas”. Departamento de comunicación