GALICIA | POLÍTICA
Pontón solicita unha reunión con Feijóo
.jpg&x=305)
SANTIAGO DE COMPOSTELA | A portavoz
nacional, Ana Pontón, solicita unha reunión ao presidente da Xunta para
abordar, desde o diálogo e a negociación, solucións aos grandes retos de País.
A líder do BNG entende que, nunha situación de crise sen precedentes en tempos
de paz, é máis necesario que nunca deixar de lado o partidismo e a confrontación
e dar alternativas á cidadanía.
“Solicito unha
reunión co presidente da Xunta porque, dada a situación de crise que vive
Galiza e a súa durísimas consecuencias, é tempo de diálogo, de propostas, de
negociación e de sumar en positivo para sacar este País adiante e darlle
solucións aos problemas da xente, para dar esperanza de futuro por parte de
quen temos a obriga de facelo, tanto desde o Goberno como desde o principal
partido da oposición”, salientou Pontón.
En democracia “é normal” que o xefe do
Executivo se reúna coa líder da oposición, -indicou-, e de cara a esa xuntanza
a líder do BNG formula catro cuestións clave. Primeiro, reforzo da sanidade
pública e un plan de vacinación que permita vacinar 24/7 en canto se solucione
o problema de subministro; segundo, defensa dos intereses de Galiza nos fondos
europeos de recuperación, Next Generation;
terceiro, plan de rescate real para os sectores máis afectados pola pandemia e
cuarto, traballar nun novo modelo de coidados que garanta unha vellez digna aos
nosos maiores. “A cidadanía merece que os seus
representantes deamos o mellor para aportar solucións, deixando de lado
partidismos e enfrontamentos”, recalcou, destacando onde ten o BNG as súas prioridades.
“O adversario á bater é o virus, o
adversario a bater é paro, o adversario a bater é o peche de empresas e
negocios. A crise sanitaria e económica son os adversarios contra os que
loitamos desde o BNG e por iso solicito esta reunión ao presidente da Xunta co
ánimo de establecer un diálogo e unha negociación que sirva para mellorara a vida
das galegas e dos galegos nun momento tan complexo como o actual”, argumentou.
Este escenario de crise sanitaria, económica
e social require propostas de alcance “e que todas e todos arrimemos o ombro
para saír adiante”, subliñou, recalcando que o BNG está “por aportar en
positivo para mellorar a vida da xente e por ofrecer solucións nun momento que,
como nunca, require altura de miras”.
Preguntada pola
interpretación que fai da campaña de ataques contra o BNG e, en particular,
contra a propia portavoz nacional, Pontón indicou que esa é unha cuestión á que
debe responder Feijóo a quen dixo ver nervioso, “parece como se o seu compás
apuntase a Génova e agora se sentise un pouco desnortado”, ironizou en relación
ao anuncio do PP de pechar a súa sede central en Madrid.
Pero unha vez
máis insistiu en que, neste contexto de pandemia, “o adversario a bater é virus
e o que Galiza precisa é un goberno centrado ao 100% en facerlle fronte á
pandemia e non a un presidente da Xunta que non deixa de dar mostras de
nerviosismo e en facer oposición da oposición”.
“A min,
reiterou, o que me preocupa é a loita contra a pandemia, dar solucións nun
momento en que a maioría social o está
pasando moi mal, e Feixóo saberá porque lanza contra min unha campaña de ataques
e descualificación mesmo persoal. A prioridade é saír da crise e nesas está o
BNG”, concluíu. Departamento de comunicación