MAR NEGRO
O BNG denuncia a participación española en manobras militares dos EEUU no Mar Negro
MADRID | O BNG demanda explicacións ao Goberno
español pola súa decisión de despregar no Mar Negro un importante continxente
militar ao servizo da OTAN e Estados Unidos. A formación nacionalista denuncia
o custo económico que supuxo para as arcas públicas o despregamento das dúas
fragatas en plena pandemia onde a
prioridade do executivo español debería ser salvar vidas e non tomar
posicionamento nunha área xeopolítica tan delicada.
Ante a decisión do
Goberno do Estado de despregar dúas fragatas da Armada española, a F-105
“Méndez Núñez” e a F-105 “Cristóbal Colón”, ambas con base en Ferrol, o Bloque
Nacionalista Galego rexistra iniciativas no Congreso para exixir explicacións
ao executivo por tomar parte neste importante continxente militar ao servizo da
OTAN e os Estados Unidos e mesmo reclama que explique cales foron os intereses
do Estado español que se poñen en xogo no Mar Negro e no estreito do Bósforo.
A presenza deste continxente militar da OTAN con
participación española provocou unha reacción defensiva por parte de Rusia que
despregou 6 submarinos e outras unidades navais e aéreas nesas mesmas augas
para “monitorizar” os movementos das fragatas españolas. “A manobras militares
da OTAN están a alterar a fráxil estabilidade política desa rexión. Estas dúas
unidades navais, cunha tripulación de 450 militares e que portan helicópteros
de ataque naval, súmanse á presenza doutros seis cazabombardeiros españois
eurofighter despregados desde Romanía e que están encargados de interceptar
avións rusos nese espazo aéreo” enfatiza o deputado do BNG no Congreso, Néstor
Rego.
Así, todo parece indicar que estas actividades
están tendo repercusións negativas nunha área xeopolítica delicada e que xa
provocou o expreso rexeitamento do Goberno ruso. “A participación española nestas manobras só é explicábel
desde unha perspectiva de total submisión española ás directrices
norteamericanas en materia de política exterior” salienta o deputado
nacionalista.
Alén do mais, a formación nacionalista
denuncia o custo económico que supuxo para as arcas públicas o despregamento destas unidades navais e
aéreas e do persoal respectivo durante a pandemia xerada pola COVID-19 e o BNG
convida ao Goberno do Estado que reconsidere esta política internacional
intervencionista que segue as directrices dos Estados Unidos e mudala por unha
de neutralidade. Departamento de comunicación