A CORUÑA | LUDOPATÍA
A Deputación insta á Xunta a que impulse un Observatorio e unha Lei do Xogo para previr a ludopatía entre a mocidade
A CORUÑA | O pleno da Deputación da Coruña aprobou hoxe por unanimidade de todos os
grupos políticos unha moción impulsada polo Goberno provincial (PSOE e BNG) instando á Xunta de Galicia a que impulse, no
menor espazo de tempo posible, un Observatorio do Xogo e unha Lei do Xogo de
Galicia “que recolla todas as accións necesarias para a prevención das condutas
adictivas asociadas ao xogo e as apostas e que regule o acceso a este de mozos
e mozas”.
O pleno provincial reclama tamén ao goberno
autonómico que cre un Observatorio Galego do Xogo que permita coñecer a
situación actual desta lacra, como ferramenta esencial para poñerlle freo.
Ademais, acordouse poñer en coñecemento dos
concellos a información do programa piloto de prevención da ludopatía que está
a levar a cabo a Deputación da Coruña en colaboración con AGALURE, entidade de
referencia da provincia neste ámbito, nos centros educativos para que os
centros de secundaria que non estean adheridos se sumen no futuro se o
consideran oportuno.
O pleno aprobou tamén por unanimidade unha moción da
Marea Atlántica solicitando a modificación das bases dos programas de
subvencións da Deputación para investimentos en materia de medioambiente.
Contra
o peche do centro de operacións de Naturgy na Coruña
Coa abstención do PP e os votos favorables de PSOE,
BNG, Marea Atlántica e Alternativa dos Veciños aprobouse unha moción impulsada
polo Grupo Socialista en contra do peche do centro de operacións de Naturgy na
Coruña.
A Deputación defende a necesidade de manter o centro
na cidade para “garantir un servizo nas mellores condicións” e traslada o seu
apoio ás reivindicacións traballadores e traballadoras do centro, rexeitando o
seu traslado a outras localizacións.
Tamén coa única abstención do PP, aprobouse unha
moción de Alternativa dos Veciños en apoio ao sector do espectáculo, as
orquestras e bandas de música da verbena galega.
O pleno rexeitou as dúas mocións presentadas polo
Partido Popular para a aprobación dun novo plan provincial destinado á
financiación de obras de saneamento e abastecemento de auga e o incremento dos
fondos PEL para atender as necesidades non cubertas ata o momento.
As iniciativas foron rexeitadas cos votos de todos
os grupos agás o propio PP, tras explicar os portavoces dos distintos grupos
que o Plan Único xa cubre as necesidades dos concellos nesta materia. Desde a
súa creación en 2017, o POS+ financiou 294 obras de ciclo da auga (saneamento e
abastecemento) nos concellos coruñeses, cun investimento de 36,5 millóns de
euros.
No caso do PEL, o deputado de Emprego, José Ramón
Rioboo, destacou que a Deputación leva investido 28 millóns de euros en axudas
directas a autónomos e microempresas, entre eles a hostalaría e as axencias de
viaxes, que a partir do luns poderán solicitar axudas por importe de 9 millóns
de euros nunha nova edición do programa REACTIVA específico para estes
sectores, que están entre os máis afectados pola pandemia.
O pleno aprobou tamén unha moción do BNG instando á
Xunta a aprobar e desenvolver un novo Plan sectorial eólico para Galicia que
adecúe os proxectos, en canto á localización e tamaño, as características do
territorio e fomente iniciativas coma os parques enerxéticos comunitarios ou o
autoconsumo.