GALICIA | POLÍTICA
Pontón acusa a Feijóo de ter Galiza como "segundo prato"
SANTIAGO DE COMPOSTELA | Galicia precisa un goberno centrado e dar solucións á crise de prezos pero o que ten é
un Executivo do PP paralizado polas liortas internas de poder das baronías,
para determinar quen se queda coa cadeira que deixa vacante Feijóo.
“Levamos dous meses cun Goberno e cun
presidente que ten como prioridades tapar a corrupción do seu partido,
xustificar os seus pactos coa extrema dereita e calmar as augas internas do
PPdeG, onde quere deixar todo atado e ben atado. Pero Galiza non pode ser o
segundo prato, poñendo os intereses partidistas do PP por diante dos intereses
dos galegos e das galegas”, denunciou a líder do BNG, Ana Pontón, desde Noia,
onde mantivo un encontro na confraría para analizar a situación do marisqueo
nesta ría, unha das máis produtivas do País.
Feijóo fai tempo que xa está en Madrid,
mesmo fisicamente, hoxe mesmo está na sede de Génova e non en San Caetano, “é
dicir, está traballando para o PP mentres cobra un salario dos galegos e das
galegas”, reiterou, “pero este País non pode estar paralizado até xuño e moitos
menos polos problemas e as loitas internas de poder” na carreira desatada entre
baronías para coller o relevo do xefe dos populares.
Por iso, a portavoz nacional do Bloque
reclámalle a Feixóo que “non alongue máis” o proceso de sucesión, “porque Galiza
non pode estar até xuño cun goberno sen cabeza no medio dunha crise económica
que a escala de prezos non fixo máis que agudizar, un contexto que require un goberno
ó 100% e non un goberno paralizado. As loitas internas polo poder non as poden
pagar os galegos e as galegas”, concluíu. Departamento de comunicación