GALICIA | SEDEXPO 2025
A feira de seguridade, defensa e emerxencias Sedexpo 2025 recibe a máis de 3.300 visitantes cun perfil de "gran calidade"
REDACCIÓN | A III Feira Internacional de Seguridade, Defensa e Emerxencias, SEDEXPO 2025, pechou hoxe as súas portas na Feira Internacional de Galicia ABANCA tras converterse dende o pasado mércores nun escaparate tanto das innovacións nestes tres sectores sinérxicos como da labor e capacidades dos servizos de Emerxencias e as Forzas e Corpos de Seguridade do Estado.
Durante estes días o recinto recibiu a 3.346 visitantes. Asistentes que se corresponderon na súa inmensa maioría con profesionais dos sectores implicados procedentes de distintos puntos de España e Portugal e que puideron coñecer as propostas de 387 firmas de 38 países, un 71% máis que na pasada convocatoria, representadas por 99 expositores directos de oito países, un 19,2% máis. Ocuparon unha superficie neta de 4.016 metros cadrados, un 11% máis.
Estes expositores trasladaron de forma xeneralizada á organización a súa satisfacción polos resultados, especialmente porque constataron nesta edición unha “gran calidade” no perfil dos visitantes en canto á súa capacidade de decisión no proceso de compra, incluíndose entre eles responsables tanto de diversas Administracións e distintos servizos de emerxencias e Corpos de Seguridade do Estado como de importantes empresas de diversos sectores en busca de propostas en seguridade. Ademais, estes días visitaron a feira empresas que expresaron a súa intención de participar na próxima edición. Unha cita que, pola actual situación xeopolítica, cabe supoñer que teña un notable desenvolvemento e implicación por parte de todas as Administracións.
A feira contou co apoio dunha vintena de colectivos, entidades e departamentos da Xunta de Galicia e da Administración Central. Ademais de inaugurarse o evento coa participación do conselleiro de Presidencia, Xustiza e Deportes da Xunta de Galicia, Diego Calvo, e o conselleiro do Mar, Alfonso Villares, Sedexpo contou coa presenza de distintos directores xerais da Xunta. Entre eles, acudiu os dous primeiros días o director xeral de Defensa do Monte, Manuel Rodríguez, e hoxe estiveron presentes o director xeral de Emerxencias e Interior, Santiago Villanueva; a directora xeral de Estratexia Industrial e Solo Empresarial, Margarita Ardao; quen repetiu visita, e o xerente da Axencia Galega de Emerxencias (Axega), Marcos Araújo, presente todos os días do certame. Tamén o subdelegado do Goberno en Pontevedra, Abel Losada, acudiu esta mañá á feira e ao acto de apertura do I Foro AJDSE da Seguridade Privada en Galicia, clausurado por Santiago Villanueva.
Un atractivo programa
O programa de Sedexpo 2025 destacou tanto pola categoría das súas xornadas como polas súas magníficas demostracións e simulacros. En canto ás primeiras, foron máis de trinta e incluíron 50 conferencias impartidas por un centenar de expertos.
Os dous primeiros días celebráronse xornadas de seguridade sobre temas como a rede de laboratorios e centros demostradores para a investigación e innovación en solucións de ciberseguridade en Galicia, desminado humanitario no Sáhara, futuro da seguridade privada, ciberseguridade ou operacións de loita contra o narcotráfico en espazos marítimos. En emerxencias analizáronse aspectos como a resposta ante a contaminación mariña accidental en Galicia: o plan Camgal e o servizo público de Gardacostas de Galicia, presentación do dispositivo enviado por Galicia na Dana de Valencia ou o work-shop e simposio Fire Res, centrados en “Interface Rural” e “Incendios forestais extremos”. Así mesmo, o sector aeroespacial e drons expuxo aspectos como o dron como resposta á ameaza terrorista ou drons e escoltas: futuro da protección persoal e a seguridade.
En canto ao día de hoxe, as conferencias abordaron aspectos como plans de emerxencias de encoros, comunicacións en situacións de emerxencia e tecnoloxía Es-Alert, a intervención en emerxencias mediante o emprego de medio non tripulado da Unidade de Drons da UME (Udrume), seguridade privada en Galicia ou Bfaero: o despegamento da Galicia aeroespacial.
Ademais das conferencias, outra dos sinais de identidade da feira foron novamente as demostracións. Varias delas centráronse en simuladores de emerxencias e evacuación para traballar a prevención activa do persoal aerotransportado e de prácticas extremas de alto estrés en tiro. Ademais, houbo obradoiros, como o de soporte vital básico e desfibrilación automática e exhibicións de sistemas de ciberseguridade, drons ou compostos de fibra que absorben derrames de hidrocarburos en auga e en terra.
Peche con dous magníficos simulacros
Sedexpo pechou hoxe con dous rechamantes simulacros. O primeiro deles, protagonizado pola Garda Civil, consistiu na resposta coordinada de varias unidades a unha ameaza terrorista con intervención de unidades como o GRS (Grupo de Reserva e Seguridade), a Agrupación de Tráfico, técnicos en desactivación de explosivos Tedax, Unidade de Helicópteros ou Grupo Cinolóxico cos seus cans.
O outro foi un simulacro multidisciplinar xestionado en Posto de Mando Avanzado (PMA) da Axencia Galega de Emerxencias (AXEGA) mediante método GOM (Xestión Operativo de Mando) e presentación do sistema de dron cativo e comunicación multiplataforma desde PMA, organizado pola Xunta de Galicia.