PSdeG | EURODEPUTADO
González Casares: "A UE ten que compensar aos afectados polo peche de zonas de pesca e retirar a normativa"
REDACCIÓN | O eurodeputado socialista Nicolás González Casares pediu á Comisión Europea que "compense aos máis afectados polo peche de zonas de pesca ás artes de contacto de fondo", despois de que o comité científico (STECF) da propia Comisión publicase o seu informe sobre o impacto socioeconómico do peche de 87 zonas decretado pola Comisión en 2022.
"As conclusións son moi claras: en España, 16% menos de días de pesca, 20% menos desembarcos e 11% menos en valor económico. Advertirámolo. Sabiamos que sería moi prexudicial para os portos pesqueiros, pero a Comisión púxoo en marcha sen analizar sequera o impacto socioeconómico. Isto non pode volver ocorrer nunca máis", sinalou González Casares, membro da Comisión de Pesca do Parlamento Europeo, quen desde a proposta inicial da Comisión advertiu do impacto que tería no sector e da necesidade de retirala.
"O dano é gravísimo sobre todo para Galicia e por iso pedimos compensacións para os afectados", reclama o eurodeputado. O informe constata que, dos 67 palangreiros afectados, o 52,9% pertence a Burela e Celeiro (Lugo), o que representa o 94,7% e o 90%, respectivamente, da frota destes portos. No caso dos buques con artes de enmalle, o 45,8% dos afectados concéntrase en Cedeira (A Coruña) e Celeiro. Ademais, o 90% da frota de arrastre de fondo do porto de Ribeira (A Coruña) podería verse afectada.
O comité científico advirte tamén da perda de zonas de pesca, o aumento de custos operativos e impactos nos portos locais, e recomenda que "calquera solución a longo prazo protexa tanto os ecosistemas vulnerables como ás comunidades que pescaron de forma sostible nestas augas".
"A Comisión Europea ten que cumprir as recomendacións do seu comité científico, e retirar ou modificar esta norma canto antes e compensar aos prexudicados", concluíu González Casares, quen se mostrou confiado en que, se non o fai a Comisión, o faga o Tribunal de Xustiza da UE grazas ao recurso presentado polo Goberno de España contra o regulamento comunitario.