O Ministerio de Cultura solicita participar no Padroado da Fundación Torrente Ballester

O Padroado da Fundación Torrente Ballester recibiu "con agrado" a proposta do ministro de Cultura e vogal, César Antonio Molina, de que o seu departamento ingrese no Padroado da Fundación. Deste xeito, o Padroado buscará en colaboración cos responsables do Ministerio as fórmulas oportunas para materializar esa participación, segundo informou a Fundación Torrente Ballester nun comunicado. Na mesma reunión, celebrada en Santiago, Molina comunicou a súa renuncia á condición de Patrono mentres estea á fronte do Ministerio de Cultura. Entre outras cuestións, o Padroado aprobou os plans de actuación para os vindeiros anos, incluídos os preparativos do centenario do nacemento de Gonzalo Torrente Ballester, que se celebrará en 2010. Á xuntanza asistiron entre outros o reitor da Universidade de Santiago de Compostela, Senén Barro; o Presidente da Deputación de A Coruña, Salvador Fernández Moreda, e o concelleiro de Cultura de Santiago de Compostela, Néstor Rego, como representantes institucionais.