O Museo do Pobo Galego abrirá a vindeira semana unha nova sala dedicada á imprenta

O Museo do Pobo Galego abrirá o vindeiro mércores, día 2 de xaneiro, ás 20 horas, unha nova sala dedicada á imprenta, ao libro e á prensa. O director xeral de Turismo, Rubén Lois, e o presidente do Padroado do Museo do Pobo Galego, Isaac Díaz Pardo, encabezarán a inauguración. A montaxe da nova sala, patrocinada pola S.A. de Xestión do Plan Xacobeo, amosará o máis representativo da cultura letrada na historia de Galicia ata o presente, así como os oficios de impresores e encadernadores. Tamén coincidindo coas vésperas de Reis, os días 3 e 4 de xaneiro, o Museo do Pobo organiza un obradoiro de danzas e cantos de Reis, que se desenvolverá entre as 11 e as 13 horas. O condutor do obradoiro é Luís Prego, especialista nos diferentes eidos da música e danza tradicionais e con ampla experiencia como mestre de baile.