Políticos e intelectuais firman un manifiesto para defender O Castro-Sargadelos como procecto cultural

Máis dun cento de persoeiros da cultura, política e sociedade galega asinan un manifesto para pedir protección para o complexo O Castro-Sargadelos, impulsado por Isaac Díaz Pardo e Luís Seoane hai máis de medio século e que hoxe "constitúe un patrimonio cultural de Galiza enteira". Dende os ex presidentes da Xunta Xerardo Fernández Albor, Fernando González Laxe e Manuel Fraga, ata o economista e político nacionalista Xosé Manuel Beiras, o ex deputado no Parlamento de Galicia Camilo Nogueira ou o deputado no Congreso Antón Louro, unen as súas sinaturas para apoiar este manifesto. O mesmo fixeron escritores como Marilar Alexandre, Suso de Toro, Vicente Araguas, Alfredo Conde, Xosé María Álvarez Cáccamo, Xesús Alonso Montero, Antón Lopo e Anxo Angueira, artistas, como Leopoldo Nóvoa, Manuel Buciños, Ánxel Huete, Antón Pulido, Quintana Martelo e Silverio Rivas, e persoeiros da cultura galega como Antía Cal, Anisia Miranda, Xosé Neira Vilas, Avelino Pousa Antelo, Francisco Pillado, Alfonso Zulueta de Haz. Deste xeito, reclaman que o poder político do goberno galego o "declare institucionalmente" patrimonio cultural mediante "o procedemento que formalmente sexa necesario ou acaído" para preservalo e "garantir a súa continuidade e supervivencia a cuberto de calquera eventualidade e calquera peripecia empresarial que o poña en perigo de desnaturalización, destrago ou desaparición". A través do manifesto, lembran que a Magdalena e O Castro "non naceron como simples fábricas ou empresas industriais", nin tampouco Sargadelos, senón que foron "laboratorios de ideas e factoría cultural". Así, un colectivo ligado a Seoane e Díaz Pardo construíron por enteiro este laboratorio, integrado polo Seminario de Estudos Galegos resucitado, o Laboratorio Xeolóxico de Laxe, o Museo Carlos Maside, Ediciós do Castro, e o Instituto Galego de Información, como laboratorio de creación ideatoria e comunicativa, "hoxe sometido a asedio por corte de suministros". De feito, o vindeiro día 23, celebrarase no IGI un consello de administración que podería apartar definitivamente a Díaz Pardo do seu proxecto cultural. Os asinantes reivindican as factorías industriais do Castro e Sargadelos como "empresa formalmente privada que funcionou, por necesaria suplencia, con criterios de empresa pública eficiente".