A directiva de Sargadelos acusa a Díaz Pardo de "dilapidar" cartos no IGI

Cultura estudará a proposta de petición de declaración de Ben de Interese Cultural para o complexo

A directiva de Sargadelos responde ao manifesto para a conservación do complexo cultural O Castro-Sargadelos co seu "apoio" ao legado cultural "desenvolto e financiado unicamente polos accionistas de ambas as dúas sociedades". Segundo un comunicado emitido pola empresa, o perigo de continuidade dese legado "foi o que obrigou á maioría" dos socios de Sargadelos e O Castro a "promover un plan de modernización das empresas", que ao seu xuízo sufrían "os problemas dunha falla total de investimentos en formación de equipos, novas tecnoloxías e promoción exterior". Ao tempo, os directivos de Sargadelos acusan a Díaz Pardo de levar "dilapidando decenas de millóns das antigas pesetas dende hai 20 anos" co mantemento de "fracasos empresariais tan ruinosos como o Instituto Galego da Información". Afirman que o IGI "non cumpriu o seu obxectivo fundacional", é dicir, a edición do xornal Galicia, e que "comprometeu o desenvolvemento d moitas outras iniciativas socioculturais". Así, os socios e directivos d'O Castro e Sargadelos "lamentan que o seu anterior presidente, Isaac Díaz Pardo, rexeitase a vontade maioritaria e democrática do grupo" e emprendese unha campaña que "prexudica a imaxe" do proxecto que liderou. Ademais, acúsano de rexeitar a oferta da presidencia honorífica do grupo, con competencias directas na dirección das accións culturais de Sargadelos.