Cultura e Deputación chegan a un acordo para axilizar o proxecto do Dolmen de Dombate

A Consellería de Cultura e a Deputación da Coruña chegaron a un acordo para resolver o proxecto do edificio do Dolmen de Dombate, nunha reunión mantida en Santiago polo director xeral de Patrimonio, Felipe Arias, un representante da Deputación, Gonzalo Prego, e o alcalde de Cabana de Bergantiños, José Muíño, ademais de varios arqueólogos e arquitectos dos servizos técnicos das dúas institucións. Finalmente, a altura da construción que protexerá o dolmen será menor que no último proxecto presentado e o seu deseño farase máis sinxelo e transparente para proporcionarlle un maior protagonismo ao conxunto dos dólmens e os seus elementos asociados e non ao seu contedor, explican dende Cultura. Na xuntanza tratáronse aspectos sobre a conservación, protección, posta en valor e xestión do dolmen de Dombate, aínda que a Consellería aclara que "xa houbo varias en 2006 e 2007 logo de varios anos de paralización". A solución para poñer fin á paralización do dolmen acordada por ambas institucións consiste en rebaixar a altura do edificio-cuberta entre dous e tres metros e eliminar os servizos hixiénicos, que irán fóra do edificio e non dentro del, tal e como propoñía o último proxecto presentado. Mantense ademais a idea dunha pasarela ascendente para ter varios puntos de vista dos dous enterramentos megalíticos. Deste xeito, vólvese ás ideas do proxecto orixinal, que no seu día gañou o concurso convocado pola Deputación, que pretendía que non tivese unha incidencia excesiva ou agresiva para o propio monumento e a súa comprensión e percepción no contorno paisaxístico, afirman dende a Consellería. Medidas urxentes En canto á conservación, acordouse axilizar unha serie de medidas urxentes para a protección do conxunto do dolmen (incluídos os restos de pintura parietal que se conservan) con carácter provisional mentres non se constrúe o edificio que o cubra e que sirva, ao tempo, de instalación museográfica complementaria. A Consellería de Cultura e a Deputación da Coruña manterán unha liña de colaboración tanto para as actuacións urxentes e para as investigacións que continuarán no xacemento, como para a formalización do edificio-cuberta. Ademais, coordinaranse na integración e relación de Dombate co resto do megalitismo da Costa da Morte. Todas as accións previstas desenvolveranse ao longo deste ano 2008, aínda que o remate da construción, en función do proxecto executivo que se decida, poida rematarse en 2009.