O Concello da Coruña prepara un programa de activación do idioma galego na cidade

A concelleira coruñesa de Mocidade, Solidariedade e Normalización Lingüística, a nacionalista Ermitas Valencia, presentou o programa de voluntariado lingüístico, unha iniciativa coa que se pretende promover a cultura e a lingua galega e activar a solidariedade e o intercambio cultural na cidade. Segundo explicou Ermitas Valencia, o voluntariado enmárcase dentro do plano de reactivación do galego na cidade e os seus obxectivos son ?conseguir facer novas e novos galegofalantes, promover a estimación pola nosa lingua e o seu uso acotío?. Neste sentido, o Concello da Coruña colabora na iniciativa coa posta en marcha inmediata de 12 puntos de activación lingüística neutros tantos barrios e entidades, onde os interesados poderán informarse e inscribirse no voluntariado. Á presentación do programa asistiron o director do Servizo de Normalización Lingüística da UDC, Xosé Ramón Freixeiro; o director xeral de Xuventude e Solidariedade, Rubén Cela; e o presidente da Mesa pola Normalización Lingüística, Carlos Callón. Callón explicou que as persoas interesadas en participar só teñen que cumprir o requisito de ser maiores de idade, e logo anotarse nunha das dúas categorías que establece o programa: voluntarios ou activos. Os voluntarios deben ter un bo nivel de galego e, a través deste programa, compartirán os seus coñecementos da lingua e da cultura galega coas persoas ?activas? que o precisan. As denominadas ?activas? son aquelas persoas que desexan coñecer máis sobre Galicia e sobre a súa lingua e cultura. Poden ser residentes ou persoas que veñen de fóra para instalarse temporal ou permanentemente na comunidade autónoma, como estudantes ou traballadores. ?O programa consiste en promover a formación de parellas de voluntarios e persoas activas. A cada voluntario asignáselle un activo e ambos comprométense a relacionarse un mínimo de 10 sesións dunha hora, coa premisa de falar galego ou de tentar falalo o máximo posíbel?, sinalou Callón. Con esta iniciativa trátase de superar as dificultades de falar en galego e poder aplicalo á vida cotiá, ademais de promover en moitos casos a relación de persoas de distintas culturas. As parellas que se conformen poderán facer o que sexa do seu interese, desde falar e xantar ata visitar unha exposición ou facer trámites administrativos. O programa propiciará ademais actividades de lecer e de intercambio. Carlos Callón asegurou que noutras cidades de Galicia xa participaron no programa persoas de León, Xapón ou Cuba.