MÚSICA

"Feito a man 2009" encherá de música os tesouros ocultos de Compostela

Este mércores presentouse a sétima edición da mostra de creación emerxente 'Feito a man'. O programa deste festival achegará vinteoito actuacións a nove espazos privilexiados da cidade histórica compostelá. 'Feito a man' é un festival organizado pola Asociación Cultural Cidade Vella, coa colaboración da Concellaría de Cultura de Santiago de Compostela, e a súa programación intégrase, por segundo ano consecutivo, no 'Festival dos Abrazos'.

O obxectivo é descubrir escenarios singulares da cidade a través, sobre todo, de actuacións musicais. Así, entre o tres e o vintesete de agosto, celebraranse concertos en lugares como a praza de Cervantes, a rúa de Tras Salomé ou a Praza de Feixóo. Hip-hop. jazz, folk, rock... soarán no casco histórico compostelán entre as oito e media e as dez e media da noite dos vinteún días que dura o Festival. Como novidade, este ano están preparados dous concertos especiais nos que varios artistas compartirán protagonismo.

O sábado 8 de agosto, na Praza de Cervantes, a voz cubana de Jamila Trío unirase ao espectáculo teatral e musical de Fratelli Negroni e máis ao conxunto vocal do Coro da Rá. O outro concerto especial terá lugar o sábado 22 na praza da Quintana, onde se poderá escoitar o son do París dos anos trinta traído pola banda Aló Django e máis a música festiva e sorprendente de Fanfare Circalia.

Ademais deses dous fitos, 'Feito a man' conta con outras actividades sorprendentes, como os 'Concertos Comando', espectáculos que o Coro da Rá perpetrará por sorpresa en calquera punto da Cidade Vella mentres dure o festival.