FESTIVAL

"Brincadeira" espera reunir a máis de 15.000 mozos esta fin de semana en Ordes

 O Concello de Ordes calcula que máis de 15.000 mozos de toda Galicia acudirán esta fin se semana ao festival 'Brincadeira 09', que este ano chega á súa terceira edición. De feito o Concello ten preparado un operativo para acoller ata 10.000 persoas por día.

Este ano, o Festival conta cunha oferta moi completa, tanto a nivel de actuacións musicais como de actividades paralelas. Así, o venres 7 de agosto, a partir das nove do serán, o campo da feira acollerá as actuacións de La Pulquería Che Sudaka, que repite por segundo ano consecutivo, os locais Dios ke te Crew e Las Furias. Dende ás oito do serán, o DJ O Americano encargarase de ir poñendo ambiente.

Ás oito do serán do sábado 9 de agosto, actuará o grupo Everything by the air, cos DJ Johnny Gestapo e Jimmy Watergate. A partir das nove do serán, está programada unha 'Superfesta hortera', coas actuacións de Boney M, Rumba Tarumba, Chico Trujillo, Kastomä e Virüs.

Paralelamente ao festival, terá lugar un certame de arte urbano, unha mostra de novas tendencias e un concurso de fotografía. A empresa xestora deste festival habilitou un terreo cedido polo Concello de Ordes para camping, onde poderán instalarse máis de cincocentas tendas. Trátase dunha explanada ubicada a uns metros de onde terán lugar as actuacións.

En caso de choiva, a acampada sería no pavillón do colexio Campomaior, mentres que unha gran carpa con capacidade para 15.000 persoas impedirá que os asistentes aos concertos se mollen.