TELEVISIÓN
"Libro de familia" será a primeira serie de ficción autonómica que se emita nos Estados Unidos
A producción emitida pola TVG "Libro de familia" será a primeira serie de
ficción dunha televisión autonómica española en emitirse nos Estados Unidos.
Así, o serial estrearase en breve na canle norteamericana V-me.
O anuncio foi confirmado polo director xeral da CRTVG, Alfonso Sánchez
Izquierdo, a presidenta da canle estadounidense, Carmen DiRienzo, e o seu
director xeral de contidos, Guillermo Sierra.
V-me conta con 39 emisoras afiliadas e chega a 63 millóns de fogares. Xunto a
Telemundo, Univision e Telefutura, é unha das catro canles latinas máis
distribuídas, cuns importantes índices de audiencia entre a comunidade hispana
do país.
Ademais, a serie, producida polo lucense José María Besteiro, regresará á súa
cita cos espectadores galegos o próximo 20 de setembro. A quinta temporada volve
centrada na Galicia dos anos 70, década que marcará un xiro na evolución dos
personaxes.
Centrada na historia cotidiana de tres familas da imaxinaria localidade
galega de Santalla, a serie foi galardoada no 2005 polo Goberno galego co Premio
Galicia de Comunicación e no 2007 pola Academia Española de Televisión como
Mejor Serie Autonómica de Ficción.
Asimesmo, 'Libro de familia' é dos programas favoritos do público galego,
mantendo o liderado na súa franxa semana tras semana dende a súa estrea. Nos
Estados Unidos, programarase tamén no 'prime time', que V-me reserva para as
series dramáticas.