O Día das Letras Galegas é unha das datas máis simbólicas do calendario galego. Celebrámolo para honrar a nosa lingua e a nosa cultura, pero tamén para reafirmar o compromiso social co seu futuro. Desde o Sindicato Nacional de CCOO de Galicia sumámonos a esta celebración cunha mensaxe clara: o galego é do pobo, é da clase traballadora, e a súa normalización é unha cuestión de xustiza, de democracia e de dereitos. Este 17 de Maio está dedicado ás cantareiras, herdeiras da tradición oral e transmisoras da cultura popular. En homenaxe a elas, a manifestación convocada pola plataforma Queremos Galego para o propio Día das Letras converterase tamén nunha «foliada pola lingua». Desde CCOO, unha vez máis, chamamos á participación masiva nesta convocatoria. Facemos este chamamento como unha das principais organizacións sociais deste país, como sindicato de clase que leva case medio século recoñecendo oficialmente o galego como idioma propio e de uso preferente na súa actividade. Así o recollen os nosos estatutos desde 1978, mesmo antes da aprobación da Constitución e do Estatuto de Autonomía. Mais non abonda con honrar o idioma un día ao ano: cómpre garantir o seu uso real en todos os ámbitos da vida. A situación é crítica, especialmente entre a mocidade. Isto é consecuencia directa de políticas públicas que expulsan a lingua dos espazos centrais, nomeadamente do ensino. Por iso, desde CCOO de Galicia reiteramos unha esixencia clara e urxente: a derrogación inmediata do Decreto do plurilingüismo, aprobado polo Partido Popular hai xa quince anos en contra do consenso social e parlamentario que fixo posibles fitos como a Lei de normalización lingüística de 1983. Ese decreto significou o maior retroceso da historia democrática no ensino en galego e é un dos principais responsables da creba da transmisión xeracional da lingua. No canto de lle reclamar á oposición un novo pacto pola lingua, é o PP quen debe volver ao consenso que rompeu unilateralmente hai xa tres lustros. Mudar o rumbo As advertencias do Consello de Europa ou da ONU, as denuncias reiteradas do movemento social pola lingua e o incumprimento sistemático do Plan xeral de normalización aprobado por unanimidade en 2004 deixan en evidencia a política hostil da Xunta. Urxe un cambio de rumbo en materia idiomática e é preciso facelo con unidade institucional, deixando fóra calquera interese partidista. Neste 17 de Maio non celebramos só un patrimonio: celebramos un patrimonio milenario que debe vertebrar a toda a sociedade. Neste contexto, convidamos a toda a clase traballadora a erguer a voz en galego, a vivir en galego e a loitar en galego. Porque a defensa do idioma é tamén a defensa da clase traballadora galega. 
Desde CCOO comprometémonos a facer do idioma unha ferramenta activa de cohesión, igualdade e conciencia colectiva. E esiximos das institucións que abandonen a propaganda e pasen á acción: cómpre garantir agora, sen escusas, a presenza real do galego no ensino, na cultura, na Administración, nos medios e na vida laboral. Porque sen lingua non hai país, e sen país non hai futuro. Sindicato Nacional de CCOO de Galicia

Cartas al Director