Rafael Louzán confía en manter as alcaldías de Pontevedra e aumentar os deputados provinciais

A piques de rematar o seu primeiro mandato Rafael Louzán está máis que satisfeito do traballo que nestes catro anos desenvolveu a Deputación de Pontevedra, e por iso afronta as eleccións municipais con optimismo, coa seguridade de que os cidadáns van volver confiar no Partido Popular. O presidente de la Deputación destaca a ampliación do Museo e o Polígono de Barro-Meis como dous dos proxectos máis importantes postos en marcha nestes anos. Louzán critica a doble vara de Emilio Pérez Touriño o falar do voto emigrante e asegura que Rajoy é a alternativa a Zapatero. - ¿Como se presentan as eleccións municipais do 27 de maio? -Con moito optimismo. As enquisas que barallamos e as que fan os medios de comunicación son moi favorables para o Partido Popular, pero o que de verdade vale é o voto na urna, e os que teñen a ultima palabra son os cidadáns o vindeiro 27 de maio. Estamos comprobando que a resposta da cidadanía é mellor da que nun principio nós mesmos esperabamos tendo en conta que o partido non está gobernando nin en Madrid nin en Santiago. Por contra, si cabía esperar que o Partido Socialista obtivese un beneficio por estar no goberno. Sen embargo, é todo o contrario. Eses datos fanos estar moi esperanzados e pensamos que non só imos poder manter as 45 alcaldías das 62 que ten a provincia de Pontevedra, senón que ademais na Deputación imos ampliar o número de deputados actuais. -Vostede fala de maioría, pero ¿é consciente de que se non obteñen a maioría absoluta non van poder gobernar? -Ao Partido Popular non lle chega coma outros con ter a maioría. Nós temos que dobrar os nosos rivais políticos. Pero, se todo vai como pensamos, ese esforzo que temos que facer e estamos a facer vainos permitir gobernar cunha maioría estable. -¿Vai a ser vostede o candidato do PP á Deputación de Pontevedra? -Iso teno que decidir o partido. E facéndome eco dese tópico tan repetido, teño que dicir que eu estou á disposición do Partido Popular. Eu estou moi contento de que os meus compañeiros me deran esta responsabilidade, pero agora o que estamos facendo é pechar as distintas candidaturas. Do outro, falaremos a posteriori. O que queremos é contar con maior aval, e por iso estamos traballando para presentar os mellores candidatos e candidatas en todos os municipios da provincia: un equipo composto por unhas dúas mil persoas. -Tendo en conta as enquisas, ¿pensa que o PP vai poder manter ademais da de Pontevedra as deputacións de Lugo e Ourense e recuperar a da Coruña? -O noso gran reto, sen lugar a dúbidas, é acadar a Deputación da Coruña. Ese é un claro exemplo do que dicía antes, de que non nos chega con gañar, senón que temos que dobrar ós adversarios, xa que estamos 14-15. Estou seguro de que imos poder gobernar nas catro deputacións. Nos casos de Lugo e Ourense, os datos danos unha maioría moi folgada. Eu penso que o partido, despois depasar unha etapa de transición, está máis vivo ca nunca. -Nos últimos días asistimos a un cruce de acusacións entre os partidos galegos pola presunta manipulación do voto emigrante. ¿É tan importante? -O voto da emigración, que nos debe merecer a tódolos partidos o máximo respeto, volve a estar no punto de mira porque o procedemento para poder votar nas eleccións municipais é moi complexo e non facilita a participación maioritaria dos emigrantes. E iso provoca moitas suspicacias e situacións tan graves coma a que o Partido Popular denunciaba hai uns días, que o PSOE está a pagar pola obtención deses votos da emigración: paga unha porcentaxe. Iso é algo que considero moi grave. Ata hai pouco tempo, se nos acusaba a nós de manipular eses votos, pero nunca se chegou a unha posición desta envergadura. E creo que ó que lle hai que pedir responsabilidades é ó Partido Socialista. Por ese motivo quero aproveitar para solicitar a reforma da Lei Electoral, porque non é lóxico que en vez de poñer facilidades para que os emigrantes voten, se lles poñan máis atrancos, dado que ó ser un voto rogado hai que pedilo con antelación. E por iso tódolos partidos están aproveitando o movemento de persoas para invitalos a votar. -¿Pero eses votos son decisivos? -Eu creo que sí. Son case cen mil persoas as que van ter dereito a voto na provincia de Pontevedra e moitos concellos teñen un censo de residentes no exterior moi importante: tanto, que nalgúns casos supera o 50% do censo. -Vostede acaba de regresar do outro lado do Atlántico, ¿como están os galegos que viven en Arxentina e Uruguai? -Os galegos e os pontevedreses que están vivindo alí son xente maior, con moitos problemas de saúde. Por iso, na visita que fixemos, intentamos axudar, dentro das posibilidades da Deputación, ós centros asistenciais e residenciais para que os galegos con menos recursos teñan un lugar onde ir e posúan acceso ás medicinas. O maior problema que teñen neste momento é que viron reducidas as súas pensións desde a chegada do goberno socialista entre un 30 e un 40 por cento. Esta circunstancia failles máis duro poder vivir neses países. Esa é a principal queixa que nos trasmiten. Este non é a primeira viaxe que fago. Vou dúas ou tres veces ó ano a estar coa nosa xente. -¿Cal foi a razón da viaxe? -En primeiro lugar inaugurar unha bienal de arte. Esta foi a primeira vez que unha exposición da Deputación sae de Pontevedra e, ademais, por ser a primeira, queríamos adicarlla á emigración. E teño que dicir que si xa foi un éxito aquí, ó outro lado do Atlántico, en Bos Aires, o día da inauguración foron centos de persoas. Por iso, queremos levala tamén a Montevideo, porque nesa mostra hai artistas que son fillos de emigrantes. -¿Por que nesta ocasión a viaxe resultou tan polémica? -Pola cercanía das eleccións. Nos ademais dos actos institucionais, tivemos actos de partido e penso que o Partido Socialista intenta acusarnos dalgunhas cousas que eles fan a diario. Por iso suceden cousas tan curiosas como que nos acusen de manipulación porque a invitación que se repartiu levaba o nome de Rafael Louzán, como presidente da Deputación de Pontevedra e presidente do Partido Popular nesta provincia, algo que estes días eles mesmos fixeron ó anunciar a presentación da candidatura de Teresa Casal, na que se dicía que ía intervir o presidente da Xunta de Galicia e secretario do PSdeG-PSOE. Isto é rizar o rizo: eles fan cousas que logo denuncian. Eu non quero entrar en polémicas porque o noso traballo é totalmente transparante. -¿Pero tódolos partidos están a viaxar a Arxentina e Uruguai? -Cando nós volvemos, medio goberno de Galicia aterraba en Bos Aires e moitos deles aínda están alí e van volver. O señor Pérez Touriño usa dúas varas de medir: por un lado di que non vai intentar sacar réditos electorais ou partidistas; pero por outro lado están alí en momentos claves dun proceso electoral. Iso vén a confirmar que o señor Pérez Touriño se contradi el mesmo nas manifestacións que está a realizar nesta cuestión. O Partido Socialista e o Bloque Nacionalista Galego, en moitos momentos, chegaron a dicir que sería un escándalo que o voto da emigración decidise o goberno de Galicia, por exemplo. Eles dicían que sería moi grave que persoas que non coñecían Galicia tiveran decisión e, ademais, o Bloque Nacionalista na reforma do Estatuto quería que non votasen, argumentando que deberían ter dereito a voto as persoas que residan en Galicia. Todo isto é moi curioso, porque os dous partidos teñen unhas flamantes sedes en Arxentina e Uruguai. -¿Como se explica o que está a pasar? -Vivimos nun momento no que o Partido Socialista está nervioso, desnortado, precisamente polos malos resultados que lles dan as enquisas, eu penso que derivados dos desacertos que están a ter tanto no Goberno de Galicia como en Madrid. Eu creo que estamos a vivir unha situación de desgoberno e de confrontación que non nos leva a ningunha parte, provocada polo Partido Socialista. Agora faría falta un poco de sentido común nas accións de goberno que se están a levar a cabo tanto en Galicia como en Madrid e que están crispando a sociedade. -¿Nota vostede ese ambiente de crispación a nivel provincial? -Sí, independemente de que onde máis se noten sea en Madrid ou incluso en Santiago, pero é certo que hai moitas cousas das que están a suceder que nos fan pensar que o mundo está o revés. A xente non entende as decisións que se están tomando e agora mesmo o estado de dereito está en cuestión porque o goberno está a favorecer a persoas condenadas por terrorismo Nunca antes na historia de España se vivira un momento coma o actual. O Goberno central perdeu os papeis. Creo que necesitamos un cambio urxente e que o Partido Popular, na figura de Mariano Rajoy, que ademais é un pontevedrés, con tesón e sentido común é a alternativa que España necesita. O que está sucedendo agora é unha auténtica desfeita. E en Galicia, nos dous anos que leva o bipartito, non se fixo nada máis que rememorar cousas do pasado como a memoria histórica, que ó único que conducen é a confrontación. Se entre todos fixemos posible a democracia hai trinta anos, agora parece que estamos a revivir a Guerra Civil, cando todo o mundo fixo moitos esforzos por convivir en paz e superar o pasado. -¿É necesario refomar o suprimir as deputacións tal e como reclaman PSOE e BNG? -Eles piden isto porque non gobernan: o día que acaden o goberno eles mesmos dirán que as deputacións son importantes. O papel das deputación é moi importante, á hora de buscar o equilibrio entre as distintas poboacións, independemente do número de cidadáns que vivan neles. Nós somos o concello dos concellos. Cumprimos un papel fundamental e nestes catro anos lles demos un importante pulo ás infraestructuras de todo tipo, desde as culturais e deportivas pasando polas estradas. Aí está o acordo con Globalia, para ter 38 conexións con Madrid: ese é o pulo que lle estamos a dar ó Turismo. -¿Os dous proxectos estrela do seu mandato poden ser a ampliación do Museo provincial e o polígono Barro-Meis? -Hai moitos, pero eses dous son moi importantes. Pontevedra e unha cidade belísima, cun atractivo enorme e se a iso lle sumamos o novo Museo que vai ser un escaparate e que no seu interior vai a albergar centos de obras que agora están no almacén, sen lugar a dúbidas Pontevedra vai mellorar moito o seu atractivo cultural. E por iso estou moi contento de ter contribuido a que esa obra sexa un referente cultural, non só de Pontevedra, senon tamén de Galicia nos próximos anos. -¿E o polígono industrial? -Despois de tres anos, a única institución que vai poñer a disposición dos empresarios terreos é a Deputación de Pontevedra. Nos próximos días saen á venda as parcelas da primera fase do Polígono Barro-Meis, 600.000 metros cuadrados, dun total de dous millóns, que están estratexicamente situados conexión por autovía e autopista, con dous aeroportos a menos de media hora e con tres portos como son o de Vigo, Marín e Vilagarcía moi cerca. Nestes catro anos traballamos para facer posible este polígono que vai a xerar riqueza, tanto na comarca de Pontevedra, como na de Caldas o na do Salnés e que van permitir crear centos de postos de traballo. Pero tamén hai outros proxectos importantes. Estamos a construir 50 campos de fútbol de herba sintética que van facer desta provincia un referente a nivel nacional. No sector turístico apostamos por Pontevedra e compramos o Palacete das Mendoza para ubicar o Patronato de Turismo. Por todo iso e por moitas cousas máis estamos moi satisfeitos do traballo que levamos feito ata o de agora. -¿Como é a relación institucional co concello de Pontevedra? -O maior esforzo da Deputación por esta cidade fíxose nestes catro anos. Ademais do Museo ou do Patronato, aí está o campo de Pasarón que impulsou esta institución, ó igual ca Cidade Deportiva que se está a construir en Barro, porque aquí non había terreos. As rúas que se arranxaron e esa nova ponte que vai levantar a Deputación sobre o río Lérez e que vai servir para artellar as entradas á cidade. -¿Pode gañarlle Telmo Martín a Miguel Anxo Fernández Lores e a Teresa Casal? -Eu creo que acertamos coa elección de Telmo Martín, que chega cun aval contrastado e que vén a Pontevedra para transformala e modernizala, e vaino facer porque vai contar coa axuda dos cidadáns. Pontevedra necesita un cambio porque nestes momentos, tal e como di o Partido Socialista, temos un goberno que non escoita a ninguén e iso tendo en conta que eles son parte del. En Pontevedra non se fixo nada en 40 meses e a falta de 4 meses se poñen a levantar as rúas. Así non se convence os ciudadáns e de aí que estea condenado ó fracaso tal e como din as enquisas. -¿E seguirá a Corina Porro? -Si, porque si ata agora, estando en minoría, foi capaz de transformar o casco urbano e a periferia, penso que os cidadáns lle van ampliar a súa confianza dándolle una importante maioría. En Vigo hai un grupo do que me sinto orgulloso. Persoas entregadas por e para Vigo, como José Manuel Figueroa, vicepresidente desta Deputación, que está facendo un traballo impecable.