GALICIA | POLÍTICA
O BNG presenta a estratexia ambiental para unha Galicia verde
SANTIAGO DE COMPOSTELA | A
pandemia fixo máis evidente a urxencia de afrontar a crise ambiental e climática,
un reto ao que Galicia debe responder con solucións propias pensadas desde e
para o País. Con este obxectivo, o BNG deseñou unha estratexia ambiental presentada
pola portavoz nacional, Ana Pontón, no Parque
Eugenio Granell en Santiago, lugar simbólico da Galiza verde que propugna o
Bloque, fronte ao modelo de depredación do territorio e do espolio dos recursos.
“A emerxencia ambiental e climática é máis
evidente así como a necesidade de afrontalas con solucións propias e con
criterios de equidade e xustiza social”, indicou Pontón, alertando contra os
que se poñen “o traxe ecoloxista” pero buscan “converter o verde nunha xigantesca
maquinaria de facer negocio”.
A estratexia ambiental
do BNG ten como finalidade “romper cun modelo depredador e extractivo que
asigna a Galiza o papel de mera subministradora de materias primas e de enerxía,
cun forte impacto ambiental e, por riba, con escaso valor engadido”, declara. E
quere revisar un modelo económico “asentado no espolio dos recursos naturais,
no hiperconsumismo, na cultura de usar e tirar, no dispendio de bens vitais
pero finitos como a auga provocando, ademais, unha xeración excesiva de
residuos”.
Coa súa estratexia ambiental, o BNG quere sumar forzas cunha
sociedade que, cada vez máis, cuestiona o sistema dominante que empobrece o
territorio, en particular as novas xeracións conscientes de que hoxe se decide
o futuro do planeta no que terán que vivir.
“Compartimos a súa preocupación polo deterioro
do medio, polo impacto de actividades industriais e extractivas, polo dispendio
de recursos naturais, a invasión de plásticos, a calidade do aire que
respiramos e dos alimentos que comemos, pola roupa que vestimos ou pola auga
que bebemos”, enumerou Pontón. Un BNG que afronta o futuro con lentes “verdes
e lila”, sintetizou en referencia aos dous grandes movementos sociais:
ecoloxismo e feminismo.
A estratexia ambiental nacionalista inclúe trinta
propostas de actuación en sete
grandes ámbitos: biodiversidade,
enerxía, axenda urbana, mobilidade, ciclo da auga, residuos e bioeconomía, para
actuar no só no medio natural, senón particularmente no rural e urbano de onde parten as principais causas da
emerxencia ambiental. Propostas para frear a perda de biodiversidade, o risco
de grandes incendios, a contaminación ou os problemas vinculados á escaseza de
auga, entre outras cuestións. Pontón contrapuxo o modelo ambiental e
ecoloxista do Bloque co modelo do PP
auspiciado por un Feixóo que cualificou de “kamikaze” ambiental.
“Avanza na política das 3Ds, -destrución,
degradación e depredación-, poñendo a riqueza de Galiza nas mans dos lobbys enerxético, forestal e mineiro
que actúan como goberno na sombra ditando
as normas que lle permitan espremer os recursos do País”, denunciou, “por iso o BNG apoia a loita contra a invasión eólica,
porque a enerxía renovable non pode ser escusa para o espolio e a
ocupación abusiva do territorio”.
Fronte a “barra libre” e “as portas
xiratorias” que practica o PP, a estratexia ambiental do Bloque, da que a
portavoz nacional avanzou as medidas máis importantes nos sete ámbitos de
actuación citados.
Fondo de conservación da natureza
En materia de
biodiversidade, a creación dun Fondo de conservación
da natureza cun investimento de 100 millóns de euros, converter en rede natura o 20% do
territorio, un plan para combater a fragmentación de hábitats e un plan que
aborde a xestión de especies exóticas e invasoras.
En materia enerxética, a esencia da proposta nacionalista
é que a enerxía sexa considerada un ben público e un sector estratéxico, de aí
a proposta dunha empresa pública de enerxía. Igualmente, aposta clara polo aforro
e a eficiencia enerxéticas en todos os ámbitos, polas renovables e polo fomento
do autoconsumo nas comunidades locais.
No relativo á axenda urbana, a principal
proposta pasa pola elaboración participativa da Axenda Urbana Galega 2030, inspirándose nas estratexias de éxito
desenvolvidas en todo o mundo pero adaptadas á realidade do País e sumando
solucións propias. Neste sentido, o BNG toma como referencia o modelo dos seus
concellos que prima a calidade de vida, o equilibrio ambiental e o dinamismo
socioeconómico e cultural.
No ámbito da mobilidade, fomento do transporte público e da intermodalidade,
que combine bus, tren, transporte marítimo e tamén a mobilidade
ciclista. En relación a xestión da auga, deseñar a Estratexia da auga 2030, incluíndo a conservación dos acuíferos
superficiais e subterráneas, o consumo responsable e a modernización das redes
municipais de abastecemento de auga, así como a rexeneración integral das rías.
Bioeconomía e fiscalidade verde
Igualmente, reducir ao mínimo a xeración de
residuos como plásticos, os de orixe industrial, da construción e
agrogandeiros. E, en relación á bioeconomía, impulsar as actividades económicas
sustentables na fase de produción, transformación e comercialización,
promovendo circuítos curtos, km0 e mercados de proximidade. Finalmente, medidas lexislativas e de goberno para
reforzar a protección ambiental e a loita contra a emerxencia climática
incluíndo unha proposta de fiscalidade verde.
“Son as proposta dun BNG verde, ecoloxista
que sintoniza coas preocupacións da sociedade, en especial da xente moza, con
respostas aos desafíos ambientais, un arsenal de ideas para facer de Galiza un
referente do desenvolvemento sostíbel e da loita contra a emerxencia ambiental
e a crise climática”, salientou Pontón, indicando que esa estratexia será “socializala” co obxectivo de
enriquecela e mellorala.
“A política ten que estar pegada á terra e ás
persoas, os retos son grandes e as solucións non son fáciles, requírese audacia
e ambición nas propostas, e o BNG vai dar o mellor para construír a Galiza que
queremos, dona de si, próspera, innovadora, científica, feminista e verde e
imos construíla colectivamente”, concluíu. Departamento de comunicación