BANCA
O BNG propón converter o ICO nunha verdadeira Banca Pública
MADRID | O BNG vén de rexistrar no Congreso iniciativas para
converter o Instituto de Crédito Oficial (ICO) nun instrumento de dinamización
económica co obxectivo de que financie proxectos e dea crédito a entidades
públicas, persoas emprendedoras, investigadoras e PEMES. Para logra este
obxectivo, a PNL presentada polo BNG sinala que é necesario dotar ao ICO dunha
estrutura territorial maior e de medios humanos suficientes, así como aumentar
as súas asignacións nos Orzamentos Xerais do Estado e un órgano de goberno
plural con sistemas de control adecuados.
“Entendemos
que no momento actual, o conxunto do Estado necesita que non se desvíe gran
parte do investimento cara aos mercados financeiros abandonando a economía real
do pequeno tecido produtivo” sinala o deputado do BNG. “É necesario evitar a
exclusión financeira daqueles colectivos máis vulnerables e axudar a moderar os
abusos que sofren as persoas usuarias por parte das entidades bancarias que
buscan só mellorar as súas marxes de beneficio” explica.
Para
lograr abordar os retos que a crise derivada da pandemia trouxo e atallar a acelerada
desindustrialización ou atender á investigación e desenvolvemento, “precisamos
contar cunha decida intervención pública”. Desde a perspectiva do BNG, o Estado
non pode facer isto adecuadamente se non conta cunha Banca Pública, función que
podería cumprir o ICO se se lle dota da dimensión e funcións necesarias para
iso.
Na
actualidade o ICO é unha entidade pública empresarial que opera como un banco
privado, que pode pedir préstamos ao BCE, o que non se fixo nos últimos anos, e
que se financia nos mercados de capitais con emisións de débeda a longo prazo.
Trátase pois dun banco público de investimento pero de reducido tamaño, pois en
2019 o seu activo era de 32 mil millóns fronte ao 503 mil millóns do KfW alemán, o 554 mil millóns do Banco
Europeo de Investimento ou o 181 mil millóns da
Caisse de Dépôts.
O ICO presta, ben a través doutros bancos
colaboradores, ou ben directamente de forma principal a grandes proxectos de
investimento. Nestas operacións non recibe fondos dos Orzamentos Xerais do Estado
nin subvencións, aínda que si traslada as subvencións a determinadas
actividades ao cliente final en forma de menores tipos de interese.
Segundo
recolle entre os seus obxectivos, o propio organismo defínese como un
“instrumento de política económica para promover o crecemento económico",
pero dificilmente pode cumprir esa función cando o seu investimento crediticio
en 2019 foi de 21.441 millóns de euros, o que supón tan só o 1% dos créditos
totais concedidos no Estado español.
“O ICO debe dotarse adecuadamente e ser
dimensionado nos seus recursos e funcións, para que poida facer fronte a novos
retos. Desta forma podería cumprir un papel crucial para, por exemplo, apoiar o
desenvolvemento equitativo de rexións e zonas
despoboadas, promover vivenda pública alcanzable en alugueiro, financiar
investigación e, en xeral, atender ás pequenas empresas” destaca o deputado do
BNG. Así mesmo, este organismo debe cumprir unha “función chave na dinamización
da economía, atender ao financiamento de proxectos que permitan un retorno a
medio e longo prazo”.
Ademais
debe “incrementarse tanto a extensión territorial, como os recursos humanos, e
dotarse dun órgano de goberno que
garanta unha supervisión externa cualificada e plural con sistemas de
supervisión e control” apunta Néstor Rego, “e tamén será necesario aumentar as
por parte dos OXE”.
Sen renunciar a unha Banca Pública Galega
Tras
coñecer os últimos datos relativos ao volume de créditos e depósitos publicados
polo Banco de España, a formación nacionalista sinala que Galiza ten unha das
peores relacións entre créditos e depósitos de todo o Estado. “Por cada 100
euros depositados, só 74 son destinados a crédito o que evidencia como o aforro
na Galiza emigra e serve para fornecer créditos noutros territorios” apunta o
deputado do BNG.
Galicia
tamén representa a peor evolución do volume de créditos pois, se comparamos as
cifras coas de 2009, vemos que cae de 44,4% a 0,74%. “Estes datos demostra os
efectos negativos que tivo para Galiza a reestruturación bancaria, a través dun
deseño estatal e alleo aos intereses do pobo galego, coa perda de entidades
financeiras propias” sinala Néstor Rego.
“Estes
datos amosan de forma clara os graves efectos que tivo na Galiza a
reestruturación bancaria que levou á perda de entidades financeiras propias”
subliña o deputado do BNG, “e por iso é necesario deseñar medidas que favorezan
que o aforro galego serva para fixar inversións no noso País”. “Por este
motivo, o BNG aposta pola creación dunha pública galega que sirva de referente
e minimice os efecto da actividade privada, orientada unicamente á procura de dividendos
e máis beneficios” apunta finalmente Rego, “mais, sen renunciar a ese
obxectivo, entendemos que no momento actual tamén o conxunto dos cidadáns do
Estado precisan dunha verdadeira banca pública”. Departamento de comunicación