GALICIA | POLÍTICA
Pontón: "O nacionalismo galego é un movemento político forte, cohesionado e en expansión"
SANTIAGO DE COMPOSTELA | O BNG elixiu a
Praza do Obradoiro para conmemorar e reivindicar os dereitos nacionais de
Galicia con motivo do 85 aniversario do Estatuto do 36, ao que se suma a
celebración do 28N a festa do orgullo e da diversidade sexual, “dúas caras da mesma moeda, simbolizan a defensa da liberdade e
da democracia, a defensa de dereitos individuais e colectivos”, subliñou a
portavoz nacional, Ana Pontón, no arranque da súa intervención.
Con Bóveda e Castelao como grandes referentes, “fonte
permanente de inspiración, ideas e compromiso”, Pontón destacou que o
nacionalismo galego é “un movemento político forte, cohesionado e en expansión,
con vontade de ser maioría e de dirixir o futuro de Galiza”. Fronte a un “autogoberno
degradado que converte a Presidencia do País nunha institución teledirixida,
correa de transmisión das empresas do IBEX35 e da axenda reaccionaria da
extrema dereita”, o Bloque defende “unha Galiza máis forte, con capacidade para
tomar as decisións en función dos intereses do País”.
Con ese obxectivo, a líder do BNG anunciou unha estratexia
de traballo en dous ámbitos: por un lado, reclamar todas as competencias pendentes;
por outro abrir un diálogo para darlle a Galicia un novo status político. “40 anos despois é tempo de que cumpran a lei e transfiran a
Galiza todas as competencia pendentes en máis de 70 ámbitos, desde a
AP9 até a conca do Miño-Sil, desde a xestión do dominio marítimo terrestre e
ordenación do litoral até os portos, aeroportos, inspección de traballo,
tráfico ou a determinación do réxime local de Galiza”, enumerou a modo de
exemplos.
Pero o actual Estatuto xa é “un traxe do século pasado que
nos queda pequeno”, alegou, e por tanto, hai que dar un paso adiante para
conseguir capacidade real para decidir. “Por iso, unha das primeiras iniciativas do vindeiro período
de sesións será a proposta formal de
abrir o debate, sereno e con diálogo, sobre un novo status político para
Galiza, cun obxectivo moi claro: ter unha Galiza máis forte para mellorar a
vida dos galegos e das galegas”.
No Bloque, explicou a portavoz nacional, “temos claro que
necesitamos un novo status que nos recoñeza como unha nación e avancemos en
capacidade real para decidir a favor dos galegos e das galegas”, sobre todo
cando resulta evidente que no Estado estanse dando pasos para que Euskadi e
Catalunya acaden a máis poder, “e non podemos permitir que Galiza queda atrás,
relegada a unha mera rexión”, advertiu.
Poder de decisión máis necesario que nunca nun contexto de
crises que se solapan, -sanitaria, económica, social, ambiental, democrática-,
e que os grandes poderes económicos queren aproveitar en beneficio propio. “O
que nos obriga a actuar con intelixencia, con audacia, con unidade e con altura
de miras para conseguir unha saída galega, social e xusta(...), que poña por
diante o interese común, os servizos públicos, a dignidade humana, as
liberdades sociais e os dereitos nacionais”.
Unha nova Galicia con poder político
Capacidade de decidir sobre a enerxía eléctrica que produce
Galicia fronte a un lobby eléctrico
que impón o seu interese particular a través das portas xiratorias, decidir
sobre as infraestruturas, sobre o 100% dos recursos cunha facenda propia que
permita unha fiscalidade xusta e adaptada á realidade do País. Decidir sobre o mar,
rexenerar as rías e frear destrución do
noso litoral.
“En definitiva, trátase de ter soberanía a favor das persoas
que viven en traballan en Galiza”, sintetizou Pontón, “capacidade de decidir
sobre os nosos intereses, promovendo un desenvolvemento pensado desde Galiza,
respectuoso co medio, creando instrumentos fiscais e financeiros para crear
benestar e transformar a economía”.
Desde a premisa de que nada volverá ser igual tras a
pandemia, o BNG aposta por “construír unha nova Galiza”, con novas ideas e de
novos liderados, desde o ecoloxismo e o feminismo; desde a ciencia e a
innovación; desde os dereitos individuais e colectivos. “Vaise abrindo paso
unha nación imparábel, con verdadeiro poder político, unha Galiza orgullosa,
forte, viva e con futuro. Unha nación sen ataduras e sen límites”, concluíu
Pontón. Departamento de comunicación