GALICIA | POLÍTICA
O BNG presenta preto de 280 emendas por valor de 1.500 millóns
Reserva unha partida para intervir Alcoa.
SANTIAGO DE COMPOSTELA | O
BNG quere mellorar o trato que os orzamentos do Estado dan a Galiza e para iso
presentou un total de 278 emendas por importe de 1.500 millóns de euros. Unha
vez máis, a defensa “férrea” dos intereses do País é a única motivación da
formación nacionalista, que atribúe a esa defensa o feito de que os OXE para
2022 presenten unha cifra de investimento máis alta que fai un ano.
“A coherencia na defensa de Galiza da
resultados”, subliñou a portavoz nacional, Ana Pontón, quen considera que o
punto de partida é válido pero insuficiente, de tal xeito que “a día de hoxe os
orzamentos presentados polo Goberno central non teñen o si do BNG”. Por iso,
indicou, empraza ás forzas que integran o Executivo de Pedro Sánchez a
“sentarse” a negociar para incrementar os investimentos.
Foi o deputado no Congreso, Nestor Rego,
quen explicou as catro grandes áreas nas que se concentran as emendas
nacionalistas: infraestruturas, crise industrial, medio ambiente e políticas
sociais e fiscais. “Agora corresponde ao Goberno mover ficha e demostrar que hai
unha mudanza de posición e que se trata con xustiza a Galiza”, indicou, “e iso
pasa por un investimento que compense o déficit histórico, pasa porqueue a
totalidade dos impostos que pagamos aquí repercutan na mellora das condicións
de vida e de benestar de todos os galegos e galegas”.
No detalle das emendas no apartado de
infraestruturas, Rego citou a modernización das conexións ferroviarias, tanto
no norte como no sur, destacando a importancia da conexión con Portugal e do
enlace directo por tren entre Santiago e Lugo. Igualmente, poñer en marcha un
servizo de tren de proximidade e, no ámbito da rede viaria, subliñou as
propostas para mellorar a N-550 que vertebra todo o eixo atlántico.
Outro importante paquete de emendas
recolle medidas para superar a crise industrial, destacando a emenda de 200 millóns de euros
para sufragar a intervención pública de ALCOA ou a de 100 millóns para transformar
Navantia nun auténtico complexo industrial, no que a construción naval civil
xogue un papel protagonista.
Igualmente, explicou as emendas a favor
dunha transición enerxética xusta naqueles concellos e comarcas máis afectadas,
citando como exemplo a proposta de instalar nas Pontes un centro de I+D+i “focalizado” no almacenamento de enerxía.
As medidas vinculadas á preservación
ambiental teñen un papel destacado, como por exemplo os 100 millóns para a
rexeneración das Rías e, en materia de política social e de xustiza fiscal,
Rego subliñou os 200 millóns para cubrir a débeda histórica en dependencia, solucionar
a dobre tributación a 200.000 emigrantes retornados, baixar o IVE a determinados produtos e
servizos básicos e incrementar o imposto de patrimonio a partir dun millón de
euros.
Todas as opcións están abertas
Neste ámbito, o BNG tamén propón subir
as pensións mínimas até equiparalas con SMI, tendo en conta que Galiza ten as
segundas prestacións máis baixas do Estado, e a posta en marcha de xulgados
específicos contra a violencia machista en Santiago, Ourense e Lugo.
“Neste momento todas as opcións están
abertas e a nosa posición de voto definirémola cando saibamos como fican os
investimento na Galiza”, salientou Rego, indicando que ao BNG lle gustaría
poder votar si, “porque iso significaría que os orzamentos do Estado son bos
para Galiza”.
Unhas contas xerais que, como indicou a
portavoz nacional, no se reducen só a unha cuestión de cifras senón que tamén
definen liñas básicas de actuación do Executivo central que preocupan ao BNG.
“Preocúpanos que anuncien novos recortes nas pensións, os bandazos arredor da
derrogación da reforma laboral, que a Lei mordaza siga intacta ou que ante a
escalada de prezos non se tomen medidas eficaces para conter a subida da luz”,
argumentou Pontón.
Unha lista de preocupacións ás que a
líder do Bloque engadiu o lamentable episodio da renovación parcial dos órganos
xudiciais no que, grazas aos votos de PSOE e Podemos, prosperou a proposta do
PP para que o maxistrado Enrique Arnaldo se sente no Tribunal Constitucional
pese a estar inmerso en casos de corrupción, “non son eles quen tragan o sapo,
fanllo tragar a cidadanía”, subliñou. Departamento de comunicación