IGREXA
O BNG reclama ao Goberno investigar todos os bens inmatriculados pola Igrexa
MADRID | Néstor
Rego, deputado do BNG no Congreso, anuncia novas iniciativas para que o Goberno
do Estado investigue todos os bens inmatriculados pola igrexa para detectar
todos os inscritos de forma irregular e propiciar que sexan devoltos aos
verdadeiros titulares, en moitos casos a propia administración pública. Para a
formación nacionalista o
recoñecemento da Conferencia Episcopal de 1.000 bens inscritos irregularmente
non pode supor a legalización dos 34.000 restantes, polo contrario, alimenta a
sospeita de que poden ser moitos máis. No caso de Galiza, representa máis de 20% do total do Estado, ao redor de
7.131, que “deben ser devoltos a quen corresponder”.
Hai un ano o BNG rexistraba varias preguntas sobre as inmatriculacións
fraudulentas de bens pola Igrexa católica que, desde 1946 durante a ditadura
franquista, inscribiu millares de bens sen ter que acreditar a propiedade. Tanto
a Lei Hipotecaria como o Regulamento que a desenvolveu, posibilitaron que os
representantes eclesiásticos actuasen como fedatarios públicos, asegurando esa
titularidade sen necesidade doutras probas. O Goberno do PP, en 1998, ampliou ese
dereito que permitía á Igrexa inscribir tamén lugares de culto como igrexas,
mosteiros, ermidas, capelas, catedrais, etc.
“Entre 1998 e 2015 en que se suprime esa prerrogativa foron inscritos case
35.000 bens a nome da Igrexa católica, entre eles bens privados ou mesmo de
administracións públicas ou que deberían considerarse de dominio público”
explica Rego. O deputado nacionalista lembra que en 2017 foi aprobada unha
iniciativa para que o executivo estatal elaborase un informe con todas as
inmatriculacións realizadas. “Tras coñecer esa listaxe, que tardaron máis de 2 anos
en publicar, o BNG e distintas organizacións memorialistas destacaron a elevada
porcentaxe de matriculacións levadas a cabo na Galiza” denuncia.
Do total do Estado, as inmatriculacións da Galiza representan 20% do
Estado, con máis de 7.131 bens insctiros. “A maioría son propiedades urbanas e
rústicas tales como solares, garaxes, pisos, campos de festa, carballeiras de
uso público” enuncia o deputado mentres que os edificios dedicados ao culto só
son 2.747.
“Non é razoábel aceptar que porque a Igrexa recoñeza o erro en 1.000
inmatriculacións no conxunto do Estado, o resto, -case 34.000- se consideren
legalizadas”, sinala o deputado nacionalista. Por este motivo, o BNG reclama ao
executivo estatal que “estude unha por unha as inmatriculacións da Igrexa”,
desde a convicción de que “son moitas máis as fraudulentas”. Néstor Rego cualifica
como “intolerábel” dar por válidas 34.000 inmatriculacións sen sequera realizar
unha investigación ao respecto e, se for o caso, actuar para lograr que sexan “
aos seus lexítimos donos”.
Así mesmo, o BNG rexistra preguntas para a súa resposta escrita para
coñecer se o Goberno do Estado realizará unha investigación de oficio o resto
de inmatriculacións “feitas pola Igrexa desde 1946 para localizar todas aquelas
que foron practicadas de maneira irregular e sen título”. Ante estes
resultados, a formación nacionalista tamén exixe ao Goberno que reclame a
titularidade de todos os bens adquiridos de maneira irregular para que pasen a
ser de dominio público.
“É de xustiza que se realicen todas estas actuacións porque significa
defender o interese público frente unha actuación que parte dun privilexio dado
pola ditadura franquista que é absolutamente inxustificábel” conclúe o deputado
do BNG. Rego incide na necesidade de declarar nulas as
inmatriculacións realizadas pola Igrexa católica cando se trate de bens
de dominio público, en cumprimento dos principios de imprescritibilidade,
inalienabilidade e inembargabilidad dos
bens públicos. Departamento de comunicación