REFORMA FISCAL
O BNG propón unha reforma fiscal para garantir a progresividade real e a xustiza social
MADRID | O
deputado do BNG, Néstor Rego, rexistra para o seu debate no pleno do Congreso
iniciativas para o impulso de medidas xustas e urxentes para combater as
consecuencias da escalada de prezos na economía da Galiza. A frente
nacionalista reclama impulsar unha reforma fiscal para dotar de verdadeira
progresividade o sistema tributario, a comezar polo IRPF para aliviar as carga
impositiva das persoas máis vulnerábeis. Neste sentido, propón tamén que, mentres
dure a situación de inflación, se aplique a deflación da tarifa do IRPF, tanto autonómica
como estatal, para que a tributación sexa sobre os rendementos reais, así como tamén,
modificar a normativa que regula as dietas de locomoción aumentando as contías
límite de gasto, elevándoas, cando menos, até 0,30 euros.
O empobrecemento da sociedade debido á subida exponencial da inflación é un
problema político e social de primeira orde. O BNG considera urxente actuar e pór
en marcha medidas en beneficio das maiorías socias, por este motivo propuxo xa,
nas diferentes institucións das que forma parte, unha batería de accións concretas
para que tanto o Goberno estatal coma o galego, poñan freo as consecuencias da
crise para os sectores máis vulnerábeis.
O medre disparado da inflación- 8% interanual na Galiza e 7.6% no conxunto
do Estado con datos de febreiro- obsérvase de forma xeneralizada en todo tipo
de produtos, con todo, algúns fano de forma drástica e afectan indirectamente,
no prezo doutros bens e servizos. A electricidade subiu un 111,5% no mes de
febreiro, con respecto ao mes de febreiro do ano pasado; o diésel un 29% e a
gasolina un 25,9%. “As explotacións
gandeiras están a sufrir uns incrementos na factura eléctrica de 50% e de 20% e
prevese un empeoramento ao que debe sumarse a crise de abastecemento de
cereais” indica o deputado do BNG. Ademais, os alugueiros incrementáronse ao
redor de 7% desde 2015 e, segundo a FAO,
o prezo dos alimentos a nivel mundial está na súa cota máis alta desde os
últimos 60 anos.
Para o deputado do BNG, é necesario que os gobernos, tanto o da Galiza como
do Estado, impulsen distintas políticas públicas para dar resposta á escalada
de prezos que ven a superporse aos problemas estruturais xa existentes na economía
galega e aos derivados dos efectos da pandemia, e que poñen en grave risco a capacidade
de resiliencia e adaptación dos sectores produtivos e industriais. As receitas
do BCE ou da Unión europea para controlar a inflación son fundamentalmente de
carácter monetario, “mais a experiencia mostra que as medidas monetarias non
sempre son as máis adecuadas e que poden ter ademais un impacto negativo sobre
a actividade económica e o emprego” destaca.
“Mentres dure a situación de inflación, o Goberno ten que levar a cabo
todas as accións necesarias para a
deflación da tarifa do IRPF autonómica e estatal para evitar a
tributación sobre rendementos nominais e non sobre rendementos reais” explica a
iniciativa o deputado do BNG.
Rego tamén apunta na necesidade de estabelecer
distintos tipos de gravame en función da natureza dos rendementos e “sinalar as
compensacións a través de deducións que sexan inversamente proporcionais aos
tipos de gravame que soporten os suxeitos pasivos”.
Rego sinala a necesidade de “impulsar unha profunda reforma fiscal para
dotar de progresividade real o IRPF, cuestión na que se centra esta iniciativa,
mais tamén é preciso revisar os impostos sobre o Patrimonio e o de Sucesións e
Doazóns para aliviar as situacións máis vulnerábeis e aumentar a recadación
gravando as rendas máis altas de forma que Galiza, e o conxunto do Estado, non
perda recursos e que estes poidan ser reinvestidos en políticas de protección
social e de dinamización económica”.
Esta escalada xeneralizada de prezos fai que, ao longo das tres últimas
décadas, nunca fose tan caro vivir como hoxe e que as repercusións sexan
absolutamente brutais en termos económicos e sociais. Cabe lembrar que isto
sucede no marco dunha crise de materiais que afecta profundamente á industria
da construción ou automobilística e que sucede tamén nun momento onde a
desigualdade da sociedade ten unhas dimensións que levan a que máis dun cuarto
da poboación galega estivese xa en risco de exclusión social segundo os datos
de 2020 da Rede Galega contra a pobreza.
Por este motivo, a organización nacionalista reclama unha modificación na
normativa que regula as dietas de locomoción ás traballadoras e traballadores
para dar cobertura ao aumento das contías límite dos gastos de dietas e
locomoción retribuídos a traballadores e traballadoras “para que gocen de
exención, atendendo ao aumento de prezos de gastos de estadía, manutención, transporte
público, até unha contía de 0,30 euros”. Departamento de comunicación