LEI DE CIENCIA E INNOVACIÓN
O BNG presenta emendas para mellorar a Lei de Ciencia e Innovación
.jpg&x=305)
MADRID | O
deputado do BNG, Néstor Rego, e a deputada no Parlamento de Galiza, Olalla
Rodil, manteñen unha reunión con representantes do sector da investigación e
presentan as emendas parciais á reforma da Lei de Ciencia e Innovación para
resolver as diversas carencias do texto lexislativo proposto polo Goberno. A
organización nacionalista considera prioritario o obxectivo de eliminar a
precariedade laboral do persoal investigador- para o que é imprescindíbel
eliminar, entre outras cuestións, a taxa de reposición- e garantir o
financiamento público nos proxectos.
Á xuntanza, ademais dos deputados
do BNG na cámara galega e estatal, acudiron representantes da asociación ANIH,
InvestiGal, investigadoras do CSIC e delegadas da CIG-Ensino, e da CIG-Saúde,
así como traballadoras dos OPIS na Galiza entre outras. Durante a mesma, a
organización nacionalista ademais de trasladar as emendas rexistradas e lembrar
a comunicación bidireccional que se mantivo coas organizacións e asociacións do
sector para o estudo da Lei, destacou a necesidade de resolver as diversas
carencias detectadas no sistema de Ciencia, Tecnoloxía e Innovación. Ademais, o
BNG tamén procura neste Proxecto de Lei acometer de igual modo, e de maneira
decidida, o desenvolvemento da carreira profesional do persoal investigador e
científico, facendo especial fincapé no persoal técnico ao servizo dos Organismos
Públicos de Investigación da Administración Xeral do Estado, que quedan fora da
lei.
Alén do máis, Rego destaca as emendas presentadas co obxectivo de garantir
as competencias galegas en materia de ciencia e da capacidade de deseñar unha
política e “unhas prioridades en materia de I+D+i que atendan as necesidades
específicas da Galiza”. Se se pretende crear unha estratexia de ámbito estatal
que marque os obxectivos tanto para o Estado como para as CCAA, debe “respectarse
a capacidade de autogoberno e as competencias destas últimas”.
O BNG tamén rexistra outro bloque de emendas dirixidas a garantir o retorno
social dos investimentos públicos en materia de I+D+i. “Tanto na escolla dos
proxectos ou liñas de investigación ou innovación a apoiar con cartos públicos -en
que non pode primar en exclusiva o futuro rendemento económico- así como no
acceso aos avances e innovacións financiados desde o sector público, en
solitario ou conxuntamente coa empresa privada, onde o conxunto da sociedade
debe ter un acceso privilexiado” remarca Rego. “Os cartos públicos deben servir
tamén para cubrir as áreas de investigación que quedan fora do interese das
empresas por ter unha baixa rendibilidade, pensemos por exemplo na
investigación das chamadas doenzas raras” exemplifica o deputado nacionalista.
“Hai que corrixir aspectos en relación coa carreira profesional e os
dereitos laborais dos investigadores” afirma Rego, mentres sinala as emendas
que procuran solucionar os diversos problemas en relación con esta materia, así
como o referido ao persoal dos OPIS onde fai especial fincapé na inclusión do
persoal de xestión. “Tamén abordamos cuestións que quedaron pendentes a
respecto do contrato predoutoral, que finalmente logrou o dereito á
indemnización, pero onde quedan cousas pendentes, como que este avance se aplique
tamén aos contratos vixentes e se fixe o cen por cen das retribucións, ou o referido
tamén á posibilidade de manter o contrato incluso despois de presentar a tese
como contrato de orientación posdoutoral” enfatiza.
De cara a mellorar a estabilidade laboral e reducir a temporalidade das
persoas traballadoras, explicou o deputado nacionalista, o BNG a eliminación da
taxa de reposición de efectivos. “A taxa de reposición é a principal causa do
alto índice de temporalidade nas distintas Administracións públicas. Calquera
solución a este problema pasa necesariamente pola súa eliminación” explica
Rego. De facto, a organización frentista xa presentara iniciativas anteriores-
mesmo no Proxecto de Orzamentos debatidos para 2021 e 2022- que reclamaban a
eliminación da taxa.
Así mesmo, “reclamamos incrementar o financiamento público para chegar a 2%
do PIB no 2030. Entendemos que a Unión Europea marca o obxectivo de 3% do PIB
de inversión en I+D+i nesa data, e estabelece un mínimo de 1,25% público. Para garantir realmente e
chegar a 3%, o compromiso público debe ser superior ao mínimo que exixe a UE”
reivindica.
Para rematar, a organización nacionalista considera fundamental que se
incorpore na lei estatal un contido semellante ao regulado no ámbito galego coa
Lei Ángeles Alvariño. “Demandamos o estabelecemento de medidas correctoras á
hora de facer avaliacións de méritos, ben en promocións ou na valoración para
acceder a bolsas ou proxectos públicos” explica Rego. O obxectivo desta emenda
é que se compense o tempo en que a persoa investigadora estivo de baixa a causa
da súa maternidade, paternidade ou lactación, así como a baixa por embarazo,
adopción ou acollemento e mesmo nos tempos de ausencia por violencia de xénero
ou acoso. Departamento de comunicación