GALICIA | POLÍTICA
Rueda centrará as súas propostas en familia, emprego e unha "evolución tranquila"
SANTIAGO DE COMPOSTELA | O vicepresidente da Xunta en funcións e candidato á Presidencia, Alfonso
Rueda, centrará as súas propostas do discurso de investidura no que
considera que son as grandes prioridades dos galegos, "familia, emprego e
futuro", todo iso guiado por unha "evolución tranquila".
Será unha intervención no pleno de investidura, que se iniciará, este
martes ás 9:30 horas, no Parlamento galego, á que imprimirá o seu
"estilo propio" e na que, segundo fontes próximas, fará balance dos 13
anos do "proxecto colectivo" encabezado por Alberto Núñez Feijóo, do que
tomará a substitución. Así que será un discurso no que subliñará o "espírito de continuidade"
para Galicia, co obxectivo de manter os acertos, á vez que sinalará que
agora comeza unha "nova etapa" para perfeccionar o que se poida facer
mellor, polo que debullará os principais retos e formulará propostas
para afrontalos con éxito.
Entre as propostas estarán as de establecer máis apoios para mellorar a
calidade de vida dos galegos "desde o berce ata o bastón", algo que xa
expuxera Núñez Feijóo, e máis innovación e captación de investimentos
para xerar postos de traballo de calidade.
Tamén un maior impulso para trazar as liñas mestras da Galicia do
futuro, a través do que denomina unha "evolución tranquila" que reforce a
posición da comunidade galega no mundo.
No seu discurso, ten previsto facer un chamamento á mocidade, e asegurar
que a Xunta traballará para paliar as principais preocupacións dos
mozos como empregos dignos, formación de primeiro nivel e vivenda
accesible, para brindarlles novas oportunidades.
A nivel político, o candidato para presidir a Xunta apostará por blindar e ampliar a "normalidade excepcional" coa que conta Galicia, cunha maioría parlamentaria sen equivalente en España e que, segundo lembrará, foi referendada hai menos de dous anos nas últimas eleccións autonómicas.
Unha normalidade e continuidade que cre que é o que preservou á comunidade ao longo das catro décadas de andaina autonómica das rupturas que caracterizaron a outros territorios.
Ademais, referirase ao papel que debe ocupar Galicia en España e en Europa e mostrará a súa disposición para manter a lealdade institucional co Estado, entendida como "arroupar" ao Goberno na defensa dos intereses de todos, pero ao mesmo tempo indicar as cousas que deben facerse mellor. De feito, vai repasar as principais materias que o actual Goberno central ten no seu "debe" cos galegos.