GALICIA | POLÍTICA
Formoso urxe á Xunta a resolver a situación de "colapso sanitario" de Galicia
A CORUÑA | O secretario xeral do PSdeG, Valentín González Formoso, urxiu hoxe á
Xunta a que resolva a situación de “colapso sanitario” de Galicia. O
responsable socialista dixo en A Coruña que “estamos dispostos a
sentarnos co presidente da Xunta para priorizar partidas orzamentarias”
en afrontar a crise da sanidade pública galega.
Formoso
esixiu “medidas urxentes e inmediatas” para “evitar o que está a pasar
nos hospitais, cos servizos de urxencias colapsados”, e alertou de que
“en pleno século XXI, no ano 2022, estamos a falar dunha situación máis
propia dos anos 60”.
Sinalou que “se hai que facer un
quilómetro menos de autovía que se faga” pero, engadiu, unha persoa
maior “que está 48 horas nos corredores de Urxencias agardando a que se
lle asigne unha habitación” simplemente é “unha situación que hai que
resolver”.
Esixiulle á Xunta que “adopte medidas no
ámbito hospitalario de forma urxente”, cun sistema “en tela de xuízo á
vista de toda a sociedade galega”. Criticou as esperas de 8 meses por un
diagnóstico especializado, as listas de espera para cirurxía, ou “non
falemos da atención primaria, onde os pacientes teñen que agardar ata 14
días para un primeiro diagnóstico que deberan ter recibido en 48
horas”...
"O ciclo da
auga é un dos temas que máis preocupa aos concellos"
Doutra banda, O presidente da Deputación da
Coruña participou hoxe na apertura da xornada de
debate sobre o impacto da nova Lei do ciclo integral da auga nos concellos,
organizada pola Cátedra de Dereito Local da Deputación -UDC e a Cátedra
Emalcsa-UDC, e fixo un chamamento á “gobernanza multinivel e transparencia na
xestión dos recursos, dos gravámenes e dos ingresos que se obteñan por parte da
administración que xestiona o ciclo da auga”.
No
salón de graos da Facultade de Dereito da Universidade da Coruña Formoso
destacou que “o ciclo da auga é un dos temas que máis preocupan aos concellos
galegos desde hai décadas” e lembrou que “a propia ONU dentro dos seus
Obxectivos de Desenvolvemento Sostible di claramente que a auga limpa e o
saneamento é un obxectivo imprescindible”.
“Nese
senso creo que o país dos mil ríos necesita claramente ter claro cal vai a ser
o seu modelo de xestión do ciclo da auga”, explicou, alertando de que “estamos
asistindo a un plantexamento de proxecto de Lei que está dalgunha maneira
discutido por parte dos axentes locais, tanto Deputacións como concellos”.
Na
súa intervención Formoso salientou que a xestión do ciclo da auga debe rexirse
a través da “gobernanza multinivel, que é máis que necesaria nun eido como da
auga que non coñece ideoloxías, senón que coñece de realidades, de necesidades
sobre todo de infraestruturas no ámbito do saneamento e do abastecemento”. “Esa
gobernanza multinivel é imprescindible para que o desenvolvemento da Lei sexa
práctico e asumido por parte dos destinatarios da mesma”, puntualizou.
“Un
segundo punto imprescindible é a transparencia na xestión dos recursos que xera
a propia auga, que están gravados con cánones e que, polo tanto, requiren unha
transparencia na asignación dos fondos e infraestruturas”, sinalou González
Formoso, poñendo como exemplo a xestión que se fai na Deputación da Coruña “que
leva financiado co Plan Único nos últimos catro anos 364 obras que deciden os
propios concellos en base ao principio autonomía local. Un investimento de case
50 millóns de euros que dá unha idea da magnitude que lle dan os concellos da
provincia ao cumprimento normativo no ámbito do saneamento e o abastecemento da
auga”.
A
auga é un ben público cada vez máis escaso, tamén en Galicia, pese a estar nun
ámbito de alta pluviosidade, o cambio climático acelerado está a provocar
mudanzas na dispoñibilidade dun recurso que a ONU considera xa un dereito
humano. A auga como recurso produtivo e como obxecto de consumo humano é
estratéxica nun escenario climatolóxico adverso. Isto obriga a que os poderes
públicos aborden a regulación do ciclo hídrico completo, nas súas fases de
captación, tratamento, potabilización, distribución, saneamento e depuración.
Esta xornada, organizada pola Cátedra de Dereito Local da
Deputación-UDC e a Cátedra Emalcsa-UDC, que dirixen os profesores Carlos Amoedo
e Moisés Canle, respectivamente, busca
repasar os principais desafíos desta política, obxecto dunha nova lei galega,
de mellora da xestión do ciclo integral da auga. Departamento de comunicación