Nunca Máis reactívase para reclamar que se desvelen as incógnitas da vaga de lumes

Convoca unha manifestación o domingo en Santiago

A plataforma cidadá Nunca Máis volve reactivarse a fin de canalizar o rexeitamento da sociedade galega ante a vaga de lumes que desde o pasado 4 de agosto afecta á Galicia. Os seus representantes afirmaron en Santiago que os cidadáns necesitan que se desvelen todas as incógnitas que rodean a unha situación que califican de "terrorismo incendiario", con "solucións e alternativas", como indicou o xerente da plataforma, Rafa Villar. De aí que unha das primeiras accións reivindicativas anunciadas pola organización sexa a convocatoria dunha manifestación este vindeiro 20 de agosto na Alameda da capital galega. O rexurdir de Nunca Máis e a concentración deste domingo pretenden representar e dar voz aos protagonistas desta "catástrofe", nun chamamento á sociedade galega "alto, aberto e sen exclusións", como destacou Villar. Segundo asegurou, as magnitudes da "traxedia", o seu impacto e a impotencia padecida polos galegos levou a que a plataforma xurdida da catástrofe do Prestige "dese resposta desde o espazo da reivindicación social". Unha resposta complementaria a colaboración prestada pola maioría dos cidadáns que contribuiron decisivamente na extinción de moitos lumes, como destacou. Baixo o lema de "Galicia contra o lume" ou "Lumes Nunca Máis" a plataforma quere facer oír ás voces autorizadas para así subliñar "a repulsa da sociedade galega" e evitar a impunidade para os responsábeis directos e indirectos. Amais, bríndase a solidariedade ante a perda de vidas, montes, paisaxe, cultivos e casas. O seu terceiro obxectivo é concienciar e presionar aos poderes públicos para que se produza un "cambio de rumbo" nas políticas agrarias e forestais de cara a modificar as características estruturais de Galicia que levan a que, reiteradamente, arda o monte cada ano. Explicacións Os portavoces de Nunca Máis sinalan que hai que ir máis aló da especulación e da polémica ao redor das presuntas tramas. No caso de que haxa beneficiarios destas accións, segundo afirma Villar, é o Goberno o que debe presentar as probas e facilitar a información necesaria para que se entenda o que hai detrás. "Trátase dun problema de orde pública que compete ás forzas de seguridade e aos órganos xudiciais", mantén. Eis que a organización se negue a facer valoracións de urxencia ante a vaga de lumes. Pola contra, o vindeiro domingo exporán unha táboa de reivindicacións, entre a que se acha a reclamación dun "gran pacto social" que potencie o desenvolvemento do medio rural para evitar máis lumes, como apuntou Uxía Senlle. Nunca Mais si aboga por revisar as políticas agrarias e forestais desenvolvidas nos últimos anos xa que, como destacou o portavoz da Coordinadora Galega de Montes Veciñais, Xosé Pereira, un dos principais problemas das 645.000 hectáreas de monte son "invisibéis para a sociedade". Ao seu xuízo, esta situación chega polo abandono do agro e pola potenciación en exclusiva dunha política forestalista, esquecendo que "o monte ten que ser multifuncional". E, por iso, asegura que hai que fixar poboación e emprego no eido rural. Non obstante, Pereira apunta a un "cambio cualitativo dos lumes", que este ano levou a presenciar un novo "modus operandi", co ataque a vivendas e núcleos de poboación. Neste senso, Uxía Senlle, aposta polo esclarecemento das incógnitas e a necesidade de seguir a colaborar na extinción dos lumes. Pola súa banda, o portavoz da Asociación para a Defensa Ecolóxica de Galiza (Adega), Daniel López Vispo, alertou das consecuencias da perda de superficie forestal, solo, hábitats e outras formas de recursos naturais, como pode ser o caso do turismo. A erosión e a contaminación de ríos e, polo tanto, das rías galegas, son os primeiros efectos ameazantes que, de persistir esta "catástrofe", mermarán as "capacidades naturais de Galicia para sobrevivir".